KAARTE IN DIE PALM VAN JOU HAND

Hoe werk jou slimfoon en Google Maps wanneer jy nie netwerkdekking het nie? En kan jou slimfoon outomaties tussen GPS en die Russiese posisioneringstelsel GLONASS skakel?

Die nuwe Garmin GPSMAP276Cx het nog ’n hele klomp ander geheime wapens in sy arsenaal. Daar is byvoorbeeld ’n eksterne antenna wat ’n mens buite op die Cruiser of seiljag se dak kan monteer, en die Hotfix-funksie help dat dit satelliete vinniger opspoor. ’n Mens kan die kaart en jou posisie duidelik op die vyfduimskerm sien, selfs in sonlig. Daar is ook ’n drie-as-kompas indien jy laataand by jou bestemming aankom en wil sien waar die son gaan opkom voor jy jou tent opslaan. ’n Ingeboude barometriese altimeter dui ook aan hoe hoog jy bo seevlak is.

Met verskeie monteringsopsies is die waterdigte GPSMAP276Cx ewe gemaklik op ’n kajak op die oop see as op ’n 1 200 cm³-motorfiets in die boendoes. Gewone AA-batterye sal deug as jou herlaaibare litium-ioonbattery pap is en jou laaier by die huis gebly het. Met herlaaibare batterye kan die toestel16 uur aaneen pad wys en met AA’s ongeveer agt uur.

Die GPSMAP276Cx is vooraf gelaai met Garmin se Topo Active Africa-basiskaart. Dit sluit ’n gratis inskrywing op BirdsEye Satellite Imagery in waarmee jy intydse terreinaansigte op die skerm kan sien. Verskeie ander kaarte kan ook op die toestel gelaai word. Die ingeboude geheue van 8 GB kan uitgebrei word met ’n mikroSD-kaart. Aktiewe weervoorspellings en Bluetooth-, WiFi-en ANT+-verbindings waardeur die GPSMAP276Cx met ander toestelle kan praat, is deel van die pakket.

Prys: R12 999.

NAVRAE: E-pos: marketingteam@garmin.co.za