Wat eet ons vanaand?
Pasta het al soveel keer tot die redding gekom as ’n mens voor ’n leë koskas staan en wonder wat om vir etenstyd op te dis. Maak een van hierdie vyf pastageregte as jou idees aan die min kant is.
Romerige piekniek-pastaslaai
’n Koue aandete met min moeite wat vullend en propvol geur is. Ek hou daarvan om eier by die slaai te voeg. Sodoende verhoog jy die proteïeninhoud van die ete en hou jy dit terselfdertyd ekonomies.
Halwe pak pasta van jou keuse, gekook, gedreineer en afgekoel 1 rooi ui, baie fyn kap Halwe komkommer, gehalveer, pitte uitgeskraap en in klein blokkies gesny 200 g kersietamaties, gehalveer 1 blik (420 g) botterbone, gedreineer en afgespoel 250 ml bevrore ertjies en mielies, gaar gestoom en afgekoel 2 wiele fetakaas, in blokkies gesny 2 avokado’s, in blokkies gesny 4 hardgekookte eiers, afgedop en grof gekap
Sous
200 ml goeie mayonnaise Sap van halwe suurlemoen 200 ml natuurlike jogurt 60mlmelk Sout, vars gemaalde swartpeper en ’n knippie suiker
Meng die pasta, ui, komkommer, kersietamaties, bone, ertjies en mielies, fetakaas, avokado’s en eier liggies saam. Klits die mayonnaise, suurlemoensap en jogurt in ’n ander bak saam tot glad. Voeg die melk by en geur met sout, peper en ’n knippie suiker. Roer goed en gooi die sous oor die slaaibestanddele. Meng deur, bedek en verkoel vir minstens ’n uur voor jy die slaai voorsit. Lewer 5-6 porsies.
Penne met eiervrug-entamatiesous
Hierdie geurige groentesous is ’n variasie op die bekende Italiaanse ge-
reg caponata. Blokkies eiervrug word saam met uie en knoffel in olyfolie gebraai tot goudbruin en dan word olywe, tamatie, ansjovis, kappertjiesaad en kruie bygevoeg. Heel laaste word die sous gegeur en “wakker gemaak” met ’n skeut vars suurlemoensap en vars suurlemoenskil. Dit is goedkoop en geurig. Aangesien die eiervrug so ’n vlesige tekstuur het, mis ’n mens regtig nie vleis in hierdie gereg nie.
Olyfolie 2 groot eiervrugte, in blokkies gesny 10 ml droë oreganum of gemengde droë kruie 1 groot ui, grof gekap 4 knoffelhuisies, fyn gekap 2 hande vol kersietamaties, gehalveer 3 ansjovisfilette, fyn gekap 1 pakkie (100 g) ontpitte groen olywe 5 ml kappertjiesade 1 blik (410 g) gekapte tamaties of tamatiepuree 375 ml groente- of hoenderaftreksel Water Sout, vars gemaalde swartpeper en knippie suiker Vars suurlemoensap 3 ml gerasperde suurlemoenskil Vars koljander of pietersielie, grof gekap 1 pak (500 g) pasta van jou keuse
Verhit ’n goeie skeut olyfolie in ’n groot swaarboompan en besprinkel die eiervrugblokkies met droë oreganum of gemengde kruie. Braai die eiervrugblokkies in die olie tot goudbruin. Skep uit en hou eenkant. Verhit nog ’n bietjie olie in die pan en braai die ui daarin tot sag. Voeg die knoffel en kersietamaties by en braai vir ’n paar sekondes. Voeg die ansjovis, olywe en kappiertjiesaad ook by die bestanddele in die pan en skep dan die gebraaide eiervrugblokkies terug in die pan. Braai alles vir ’n paar minute saam en voeg dan die gekapte tamaties of tamatiepuree en die aftreksel by. Verhit tot kookpunt en prut tot die eiervrugblokkies sag en deurgaar is. (Vul aan met bietjie water gedurende die kookproses as dit nodig is. Daar moet redelik baie vloeistof in die sous wees sodat die gereg nie droog is as die pasta bygevoeg word nie.) Geur die sous met die suurlemoensap en -skil, sout, peper en ’n knippie suiker en roer koljander of pietersielie by.
Terwyl die sous prut, verhit ’n groot pot soutwater tot kookpunt en voeg ’n skeut olie by. Voeg die pasta by sodra die water vinnig kook en kook die pasta tot net-net sag. Dreineer die pasta en voeg by die groen- tesous. Meng deur en sit warm voor. Lewer 6-8 porsies.
Tuna-en-aspersiemacaronibakkies
Dié aandete is goedkoop en vinnig om te maak. Sit net ’n lekker slaai of twee hierby vir ’n voedsame, ligte ete. Kinders is veral lief vir macaronibakkies. As jou kinders nie van die geur van aspersies hou nie, vervang dit met iets anders. Dis die ideale resep om al die laaste bietjies oorskiet in die yskas op te gebruik.
Halwe pak (250 g) macaroni 1 blik (170 g) tuna in water, gedreineer 1 blik (420 g) aspersiestukkies, gedreineer 1 wiel fetakaas, fyn gekrummel 3 ekstragroot eiers 180 ml volroommelk 30 ml goeie mayonnaise Skeut vars suurlemoensap Sout en vars gemaalde swartpeper na smaak Vars koljander of pietersielie, om af te rond
Voorverhit die oond tot 170 °C en smeer die holtes van ’n ekstragroot muffinpan met ’n bietjie olie. Meng die pasta, tuna, aspersies en fetakaas saam en skep elke muffinholte vol daarmee. Klits die eiers, melk, mayonnaise, suurlemoensap, sout en peper saam en skep daarvan oor elke porsies pasta. Maak seker dit loop goed tussen alles in. Bak vir ongeveer 30 minute tot die bakkies goudbruin en ferm is. Rond af met koljander of pietersielie en sit warm of teen kamertemperatuur voor. Lewer 6 porsies.
Pasta met murgpampoentjies, halloumi en kruiesous
Ek hou daarvan om met halloumi te kook. Die kaas is veral lekker as jy dit braai – daar vorm ’n goudbruin, bros korsie aan die buitekant, terwyl die binnekant sag en warm bly. Die kombinasie van die warm, sout, kaas, vars kruiesous en knoffelrige murgpampoentjies is heerlik.
250 g pasta van jou keuse 1 groot hand vol roket (ongeveer 30 g) 45 ml vars pietersielie, grof gekap Hand vol babaspinasieblare 100 ml olyfolie Sap van ’n halwe suurlemoen Sout en vars gemaalde swartpeper 6 groot murgpampoentjies Olyfolie, vir braai 2 knoffelhuisies, fyn gekap Halwe blok halloumi (ongeveer 200 g), in klein blokkies gesny
Kook die pasta in ’n kastrol met vinnig kokende soutwater tot gaar, maar steeds ferm. Terwyl die pasta kook, sit die roket, pietersielie en spinasie in ’n voedselverwerker en voeg die olyfolie, suurlemoensap, sout en peper by. Pols alles saam tot ’n sous vorm. Dreineer die pasta en roer die kruiesous dadelik daardeur. Hou eenkant.
Gebruik ’n groenteskiller om die murgpampoentjies in dun linte te sny. Verhit ’n bietjie olyfolie en braai die knoffel daarin tot geurig. Voeg die murgpampoentjielinte by die knoffel en roerbraai vinnig tot netnet gaar. Skep die murgpampoentjielinte op die pasta en meng liggies deur. Braai die kaasblokkies vinnig in dieselfde pan waarin die murgpampoentjielinte gebraai is, tot goudbruin en warm. Skep op die pasta en sit dadelik voor. Lewer 4 porsies.
Frikkadelle met sampioensous op fettuccini Frikkadelle
500 g beesmaalvleis 5 ml elk koljander, sout en peper 1 ui, gerasper 1 ekstragroot eier 2 knoffelhuisies, baie fyn gekap 60 ml gekapte, vars kruie
Sampioensous
45 g botter 1 ui, gehalveer en dun gesny 250 g bruin sampioene Sout en vars gemaalde swartpeper 60 ml sjerrie 125 ml hoenderaftreksel 1 houer (200 g) roomkaas
300 g gaar fettuccini
Frikkadelle: Meng al die bestanddele vir die frikkadelle saam. Vorm klein frikkadelle en braai hulle in ’n klein bietjie olie tot goudbruin en gaar. Skep uit.
Sampioensous: Smelt die botter in dieselfde pan waarin die frikkadelle gebraai is. Voeg die ui en sampioene by en braai tot gaar. Geur na smaak met sout en peper en voeg die sjerrie en aftreksel by. Verhit tot kookpunt, verwyder van die hitte en roer die roomkaas by tot die kaas gesmelt is. Voeg die frikkadelle by die sous en sit dit op vars gekookte fettuccini voor. Rond af met vars kruie. Sit dadelik voor. Lewer 4 groot porsies.