MALCOLM EN SHA DEVINE
Malcom en Sha Devine van Papillon Organics by Humansdorp wou nie boer nie, maar die produkte uit hul groentetuin was só gesog dat dit gou ’n onderneming geword het. Hulle verbou organiese kruie, slaai en talle groentesoorte, soos beet, eiervrug en murgpampoentjies.
Waarom het julle die organiese pad gevolg?
Voor ons die plaas 18 jaar gelede gekoop het, is dit hoofsaaklik vir weiding gebruik. Sedert ek my oorspronklike kombuistuin op die plaas aangelê het, het ek altyd organiese produksiebeginsels toegepas en gevolg. Toe die besigheid ontstaan en groei, was dit ’n natuurlike uitvloeisel om as organies gesertifiseer te word, want ons wou graag bewys dat ons produkte eties reg en eg organies verbou word.
Wat is die grootste struikelblok om groente organies te verbou?
Dit is moeilik om organiese saad in Suid-Afrika in die hande te kry, veral die hoeveelhede wat nodig is vir kommersiële produksie.
Hoe groot is jul aanleg?
Altesaam 49 ha is as organies gesertifiseer, maar ons plant op die oomblik in tonnels op 2 ha. (Die plaas is 80 ha groot.) Ons het ’n buffersone nodig om te verseker die gesertifiseerde area bly vry van die insekdoders wat op buurplase gebruik word.
Waar versprei julle jul produkte?
Papillon-produkte word in dele van die Oos-Kaap, van Knysna tot Port Alfred en Grahamstad, versprei. Dis ook beskikbaar by Fruit & Veg, Food Lover’s Market, Spar en ’n plaaslike Pick n Pay.
Hoeveel mense neem julle in diens?
Ons het 28 mense wat heeltyds in diens is. In die spitstyd skep ons nog een of twee ekstra werkgeleenthede.
Dis nogal baie. Hoekom is organiese boerdery so arbeidsintensief?
Dis uiters arbeidsintensief omdat dit op ’n kleiner skaal geskied en gewasse streng afgewissel moet word. Die meeste areas moet met die hand voorberei en beplant word. Onkruid is regdeur die jaar ’n probleem en ons mag geen chemikalieë spuit nie. Ons trek dit daarom met die hand uit.
Hoekom plant julle kappertjies en gousblomme langs die tonnels?
Kappertjies lok plantluise en dien as ’n strik vir luise. Die kleur geel lok ook insekte. Ons plant gousblomme om insekte af te weer en aalwurms te bestry.
Wat is die bevredigendste aspek van jul werk?
Die wete dat ons ’n etiese en gesonde produk lewer. Ons is trots daarop om ’n volhoubare onderneming te kon skep, organiese beginsels toe te pas en dat ons ’n welbekende handelsmerk in ons omgewing kon vestig.