Boere kan baat vind by BKB en GWK se ‘troue’
AS BKB en GWK slaag met planne om hul eiers in een mandjie te sit, kan dit help om boerderye winsgewender en volhoubaarder te maak.
Dís die mening van dr. Kobus Laubscher, landbou-ekonoom en voorsitter van FarmVision.
“Ek twyfel of die ooreenkoms gaan lei tot ’n totaal nuwe bakkie met ses wiele, maar dit gaan eerder twee bakkies wees wat die land op verskillende paaie gaan aanpak. Dit kan tot groot voordeel van die landbou wees.”
Die direksies van BKB en GWK het hul aandeelhouers ingelig dat hulle geleenthede ondersoek om hul besighede tot wedersydse voordeel te kombineer. Luidens die aankondiging sal dit lei tot die vestiging van ’n nuwe landbougroep van wêreldgehalte wat wesenlike waarde vir aandeelhouers en ander belanghebbendes sal ontsluit.
“Enige nuwe ontwikkelinge in hierdie verband sal betyds aan aandeelhouers van BKB en GWK gekommunikeer word,” lui die verklaring, wat onderteken is deur mnre. Chris Louw en Frank Lawrence, voorsitter van onderskeidelik BKB en GWK.
Hoewel dit nog onseker is hoe die samewerkingsmodel sal lyk, meen Laubscher dit kan Suid-Afrika se landboubesigheidslandskap betekenisvol en ten goede verander. BKB se ervaring in lewende hawe sal “’n interessante toevoeging” tot GWK wees, sê hy.
“Albei organisasies se spoor lê wyd as gediversifiseerde diensverskaffers. Hul verbintenis tot die verbetering van aandeelhouers en boere se posisie dwing respek af. Albei is kreatief om nuwe metodes te vind om die landbou se volhoubaarheid te verseker – nie net op plaasvlak nie, maar in die waardeketting.
“Wanneer die konsolidasie plaasvind, sal ’n mens moet kyk na modelle waar die unieke karakter van elkeen, wat strategiese voordele inhou, behou kan word.”
KOSTEVERLIGTING
Laubscher meen die nuwe onderneming kan boere help om die kostedruk te verlig.
“GWK se model van winsdeling met aandeelhouers is een wat baie belofte vir die landbou inhou. Boere kan nie meer staatmaak op die plaasprys van hul produkte nie, maar moet ook kyk na die insette-kant.
“As ’n model oorweeg word waar boere ’n aandeel kan behou in die winste wat ná die plaashek met die produk ontsluit word, kan dit ’n groot verskil maak. GWK se benadering saam met BKB se netwerke kan voordele inhou, veral vir die lewendehawe-produsente.”
Laubscher wil die nuwe model besparings sien meebring.
“As die twee balansstate saamgegooi en die inkomstestate gekonsolideer word, moet daar ’n bewysbare besparing kom. Dit kan nie gepaardgaan met verhoogde koste wat net verhaal kan word deur meer besigheid te doen nie. Soos die Engelse sê: leaner and meaner.