JSE BESLUIT EERSDAAGS OOR GROOT KWESSIES
DIE JSE se landbou-advieskomitee sal tussen 9 Maart en 13 Maart besluit of ’n gewaarborgdegraad-gerief ingestel, die oorsprongafslag van R100 afgeskaf en die differensiaal tussen B2- en B3-koring verlaag gaan word, het mnr. Chris Sturgess, direkteur van kommoditeite en sleutelkliëntebestuur by die JSE, gesê. Die besluite sal van toepassing wees op die Desember 2017en Maart 2018-kontrak.
Op die koringindaba wat in Februarie op Elsenburg buite Stellenbosch gehou is, het Sturgess gesê indien ’n gerief vir gewaarborgde grade ingestel word, sal opbergers JSE-silosertifikate uitreik waarop hulle die graad van die koring vir ’n vasgestelde tydperk waarborg.
So ’n besluit sal meulenaars en bakkers bevoordeel.
Koringboere vra reeds geruime tyd dat die differensiaal tussen verskillende grade koring van die huidige 4% tot 2% verlaag word.
Mnr. Koos Blanckenberg van die plaas Klipheuwel, Durbanville, en bestuurslid van Graan SA, sê die voordeel vir boere kan “enorm” wees indien die JSE se advieskomitee besluit om die graaddifferensiaal te verlaag. Hy verduidelik dit so: “Gestel die verskil tussen koring van die grade B2 en B3 is R180/ton. In Augustus sien ek daar staan ’n mooi oes op die land, maar die potensiaal is B3. Nou moet ek my kunsmistoediening in September só bestuur dat die potensiaal kan styg tot B2. Vir ’n potensiële opbrengs van 4 ton/ha kan ek in daardie geval R720/ha meer kry, maar dan moet ek nog die koste van die kunsmis aftrek.”
Blanckenberg sê as die differensiaal met die helfte verlaag word, word die voordeel wat hulle kan verkry laer as die koste. “Dan werk ek nie meer vir ’n proteïenvoordeel nie, maar vir ’n opbrengsvoordeel en ek dien kunsmis toe om my koringopbrengs te verhoog, nie die proteïeninhoud nie. Dís wat Suid-Afrika wil hê: Boere moet meer koring verbou.”
Hy sê deur die differensiaal tot 2% te verlaag, verminder boere se risiko om geld te verloor. “Soos dit nou werk, sien ons dit nie as geld wat ons kan bysit nie, maar as geld wat ons gaan verloor. Daardie potensiële inkomste is eerder die verlies wat ons gaan beperk.”