Departement moet opdok vir vrot Oos-Kaapse paaie
PADGEBRUIKERS in die OosKaap is in hul noppies nadat regter J.M. Roberson onlangs in die Grahamstadse Hooggeregshof beslis het die Oos-Kaapse departement van paaie en openbare werke moet binne 90 dae kontrakteurs identifiseer om sekere paaie in die provinsie te herstel.
Die uitspraak volg ná ’n regsgeding wat Agri Oos-Kaap twee jaar gelede teen die provinsiale direkteur-generaal van paaie aanhangig gemaak het om dringende instandhoudingswerk te doen. Roberson het beveel dat: Geïntegreerde roetine-onderhoud binne ses maande aan paaie gedoen moet word. Waar die departement nie self herstel- en instandhoudingsdienste kan bied nie, moet ooreenkomste binne ses maande met munisipaliteite of kontrakteurs aangegaan word. Binne 90 dae ná die hofbevel moet volledige besonderhede voorsien word oor die paaie wat herseël en gerehabiliteer moet word, en daarna moet die werk binne ses maande begin. Lede van van Agri Oos-Kaap sal in sekere gevalle self kwotasies vir herstelwerk mag bekom, magtiging kry om die werk uit te voer en betaling van die departement eis. Soortgelyke prosedures sal geld waar individuele boere noodherstelwerk aan paaie moet doen en die departement in gebreke bly om dit uit te voer. Die departement moet ook die organisasie se regskoste betaal en voor 30 Mei ’n vorderingsverslag by die hof indien.
Mnr. Doulas Stern, voorsitter van Agri Oos-Kaap, was verheug oor die uitspraak. “Dit beteken dat ons nou die werk vir die regering kan doen en hy ons daarvoor moet vergoed. Dit is ’n waterskeidingsuitspraak.”