ANC soek nie EFF-steun vir onteiening sonder vergoeding
DIE ANC sal nie die 6% pasella steun wat die EFF aanbied, aangryp ten einde die nodige tweederdemeerderheid in die Parlement te kry om die eiendomsklousule in die Grondwet te wysig nie. Dié wysiging is nodig om grondonteiening sonder vergoeding moontlik te maak.
Die EFF het verlede week ’n mosie ingedien waarin hy vra dat die Parlement erken artikel 25 (1) van die Grondwet, wat private eiendomsreg beskerm, is die rede hoekom die grondkwessie onopgelos bly.
Die mosie vra ook dat die Parlement ’n ad hoc-komitee op die been bring om die eiendomsklousule in die Grondwet te wysig sodat die staat grond sonder vergoeding in die openbare belang kan onteien.
Die Nasionale Vergadering het met 261 stemme teen 33 teen die mosie gestem. Twee LP’s het buite stemming gebly.
ALBATROS
Mnr. Jeremy Cronin
Adjunkminister van Openbare Werke wat belas is met die Wetsontwerp op Onteiening, het gesê artikel 25 word nie as ’n albatros om die nek gesien nie en kan nie blameer word vir die stadige pas van grondhervorming nie. Hy het benadruk die Grondwet moet verdedig word teen moontlike onbedoelde gevolge, soos vergrype deur ’n klein elite in die naam van openbare belang. Me. Phumuzile Ngwenya-Mabila, ANC-LP en voorsitter van die portefeuljekomitee vir landelike ontwikkeling en grondhervorming, het die EFF se mosie prontuit verwerp. “Ons ken die geskiedenis van hoe die grond onteien is. Ons weet ook hoe ons dit gaan aanpak. Ons sal nie voorgesê wordwatomtedoennie. “Ons as die ANC stem wel saam dat die grondhervormingsproses stadig is.” Sy het gesê onteiening sonder vergoeding is ongrondwetlik en Suid-Afrikaners moet die Grondwet respekteer. Die PAC, APC en die UDM het die mosie gesteun.