SST88 SE FUT NOG LANK NIE UIT
Daar is goeie nuus vir boere wat die afgelope 20 jaar die koringkultivar SST88 met groot welslae verbou, maar bekommerd is dat dit van die rak gaan verdwyn.
Werk om dié kultivar te verbeter, gaan voort by Sensako, die maatskappy wat die meeste van die saad wat in dié stadium in die Kaapse koringgebiede verbou word, ontwikkel het.
SST88 is in die 1990’s deur die legendariese graan- en peulgewasteler dr. Bart Lombard vir Sensako ontwikkel. Hy is in April 2015 oorlede, maar die kultivar leef voort. Boere loof die kultivar met die lang groeityd vir sy droogteverdraagsaamheid, stoelvermoë en uitstekende wortelstelsel. SST88 lewer goeie opbrengste in dele van die WesKaap met ’n wisselvallige reënval en waar siektedruk laag is.
SST88 se roesweerstand het egter nie die toets van die tyd deurstaan nie. Drie bespuitings om swamme, soos blaar-, streep-, stam- en witroes, te bekamp, is meermale nodig. Party boere het opgehou om die kultivar aan te plant toe hulle besef het meer as drie bespuitings is soms nodig.
Mnr. Driecus Lesch, teler van Kaapse lentekoring by Sensako op Napier, sê hulle is besig om te toets hoe hulle SST88 se siekteweerstand kan verhoog.
Ongelukkig het die kultivar nie ’n goeie kombinasievermoë nie. Dit beteken as die kultivar met ’n ander kultivar gekruis word, is die nageslag nie beter nie. In teenstelling daarmee het die kultivar ST047 ’n gemiddelde opbrengspotensiaal, maar dit het ’n goeie kombinasievermoë en kan beter nageslag gee. “Dit sal fantasties wees as ons SST88 siekteweerstand kan gee. Vatbaarheid vir siektes is al wat die kultivar terughou,” sê Driecus.
Dr. Francois Koekemoer, direkteur vir navorsing en ontwikkeling by Sensako, sê droogtestres is ’n moeilike eienskap om in ’n teelprogram te hanteer, veral omdat Suid-Afrikaanse telers nie toegang het tot goeie plantfisioloë en tegnologie wat die koringtelers kan ondersteun nie. “Australië bestee baie geld daaraan om droogteverdraagsaamheid uit te pluis, asook tegnologie te gebruik wat sodanige teling vergemaklik. Ons koringmark is te klein om soveel soos hulle te belê.”
Aangesien hulle nie die droogteverdraagsaamheid van SST88 geneties kan verander nie, is dit moeilik om dit te dupliseer. Sensako is egter besig met ’n projek om “’n SST88 met roesweerstand” te ontwikkel met “merker-ondersteunde seleksie”.
Dr. Renée Prins van Cengen en prof. Zakkie Pretorius van die Universiteit van die Vrystaat is ook daarby betrokke. “Ons hoop om die droogteverdraagsaamheid van SST88 in die proses te kombineer met goeie weerstand teen roes. Die projek is in ’n gevorderde stadium en voorlopige resultate lyk belowend.”
Francois het die Wintergraantrust en sy tegniese komitee twee jaar gelede oortuig om geld beskikbaar te stel om Australiese tegnologie te bekom. As deel van die projek word SST88 eersdaags by The Plant Accelerator® in Adelaide, Suid-Australië, ondersoek.
Hulle hoop die gevorderde tegnologie vir die fenotipering van plante sal aandui of hulle die meganismes wat SST88 se droogteverdraagsaamheid beïnvloed, geneties sal kan manipuleer.
–