DIE PROJEK IN ’N NEUTEDOP
Mnr. Gavin Hardy se weldeurdagte projekplan en nougesette aandag aan besonderhede tydens die voorbereiding-, uithaal-, vervoer- en herplantproses van die 12 jaar oue lietsjiebome was waarskynlik die sleutel tot sy sukses.
’n Prosedure is ingestel sodat elke boom binne ses uur herplant kon word — 80 km van die terrein — sonder om die wortels te laat uitdroog. Uiteindelik was die gemiddelde tydsverloop tussen die uithaal en herplant van die bome sowat vier uur.
Die bome is vooraf behoorlik natgemaak sodat die hidrouliese grawe maklik in die grond ingesteek kon word en die grond nie van die wortels af loskom nie. ’n Organiese swaminhibeermiddel is vooraf toegedien om moontlike swambesmetting by die afgesnyde wortels te voorkom.
Die bome is tot op kniehoogte teruggesnoei. Die stamme is met ’n 50-50-mengsel van wit PVA-verf en water geverf om sonbrand te voorkom. ’n Wondseëllaar is toegedien en ’n rooi verfkol is vir rigtingoriëntering op die sentrale stam aangebring.
’n Bobcatoperateur het eenvoudig die boomuithaalmeganisme om die sentrale stam geplaas en die voertuigstutte geaktiveer. Die vier hidrouliese grawe is om die beurt om die stam en effens skuins na binne in die grond ingedwing. Daarna het die operateur eenvoudig die boomstam met sy wortels uit die grond gelig tot op ’n gerieflike hoogte waar ’n helper die oortollige boomwortels tussen die grawe afgesaag het. Die boom is dan weer in die gat laat sak. Die hele proses het slegs enkele minute per boom geduur. Die losgemaakte bome is een-een met ’n veeldoelige laaigraaf (TLB) uit die gat gelig en op ’n vragmotorbak gelaai. Vier vragmotors per dag is gebruik om die uitgehaalde bome 80 km ver te vervoer.
Op Butterfly Farms, waar die nuwe uitbreidingsboorde se grond reeds met riwwe en en plantgate voorberei is, is die bome een-een in die gate geplaas en volgens die rigting-oriënteringsmerke op die stamme geposisioneer. Grond is onmiddellik met handgrawe om die bome ingewerk en so gou moontlik deeglik natgemaak met water wat met erdwurmkompos verryk is. Die bome is weer met die PVA-watermengsel geverf om die stamme te beskerm. Later is twee verskillende soorte mikrobemengsels met 10 liter water per boom toegedien.
Omdat ’n streng organiese benadering op Butterfly Farms gevolg word, is bees- en hoendermis, kompos en kalk op die riwwe gestrooi voor die plantgate meganiese gegrou is.
Die nuwe boord is teen ’n boomdigtheid van 5 m x 3 m gevestig, met ’n beoogde maksimum hoogte van 2,2 m. Die bome se vegetatiewe groei is van die begin af bestuur vir ’n boomgrootte van 3m x 3 m x 2,2 m om verdigting te voorkom.