Bewaar vog met LEMKEN
Karat-werktuie is ideaal vir ’n stoppelland. Met ’n vlak bewerking in die bogrond bly die vog én die plantmateriaal behoue.
Nadat 4 700 ha oor drie seisoene bewerk is, wag mnr. Joe du Plessis, plaasbestuurder van die Rossouw-boerdery naby Delmas in Mpumalanga, steeds dat die twee Karat-werktuie van LEMKEN moeilikheid moet begin gee.
“Die werktuie is stewig en werk hard en vinnig. Ons moes nog net skare vervang – geen ander onderhoud was nodig nie.”
Die Karat-tandkombinasiewerktuig word ná die strooptyd gebruik om deur die stoppels te werk. Dit plaas die organiese materiaal net onder die oppervlak waar dit kan afbreek om die grond te voed. Dieselfde bewerking berei die saadbedding voor en daarom is geen ander bewerking voor planttyd nodig nie. Dit beteken ’n groot besparing aan brandstof en arbeid.
Joe sê die saadbedding is sag en fyn tot op 280 mm (hul werkdiepte), maar wanneer die Augustuswinde by Delmas verbyswiep, hoef hulle danksy die dubbelstel-rollers agteraan die Karat nie bekommerd te wees dat die organiese materiaal en bogrond wegwaai nie.
Hulle het besluit om twee Karats van 4 meter te gebruik pleks van breër toerusting, want hulle wil die voordele van vinniger bewerking benut. Elke werktuig bewerk gemaklik 40 ha per dag. Die Karat verrig sy beste werk teen ’n betreklik hoë spoed.
Die materiaal word goed begrawe. Die kouters maak die grond agter die tande gelyk en die rollers van verskillende groottes loop in mekaar se spore om die laaste kluite te breek vir ’n saadbedding wat fyn dog ferm is.
STROOPTYD
Joe sê hulle het in die afgelope nege jaar ’n stelsel van minimumbewerking gevolg om soveel vog as moontlik in die grond te bewaar. Stoppelbeweiding word sover as moontlik vermy om die organiese materiaal se volume te behou en vastrappery van die grond te voorkom.
Mnr. Karel Munnik van LEMKEN SA sê hy verstaan dit is moeilik as voer skaars is, maar in sekere gebiede en as die weer dit toelaat, moet boere dit oorweeg om eerder kuilvoer te verbou of ander voergewasse te gebruik as om die stoppellande vir wintervoeding te bewei. Die praktyk om reste net ná strooptyd in die grond in te werk om die humus in die grond op te bou en sodoende die grond se struktuur te verbeter, kan jou oes deur ’n volgende droogtetyd dra.
Karel sê elke mieliestam of koringhalmpie wat in die grond bly staan, werk soos ’n windpompie om vog uit die grond te onttrek. “Daardie stam suig die water uit die grond en dit verdamp net in die lug.” b.swart@lemken.com; 082 404 9651; k.munnik@lemken. 082 412 2577; www.lemkensa.co.za com;