T8-reeks is staatmaker vir landbou
New Holland se nuwe geslag T8-trekkers het verlede jaar hul buiging op die Nampo-Oesdag gemaak. Sedertdien het dié reeks homself in die landbou gevestig.
Vier van New Holland se reeks T8-trekkers is in Suid-Afrika beskikbaar. Ná landwye demonstrasies is dit duidelik watter voordele dié reeks vir boere inhou.
Die trekkers in die T8-reeks spog met die langste wielbasis in hul klas. Die gewig word optimaal versprei wanneer swaar, driepuntgemonteerde werktuie aan die swaardienskoppelstuk gehaak word. Wielglip verminder ook drasties, wat tot meer bewerkte hektare lei, terwyl die boer diesel bespaar.
Hoewel werktuie soms vir die beste bewerking teen ’n hoër spoed gesleep moet word, ervaar die operateur stabiliteit en ’n gemaklike rit sonder duur voorasvering.
RUSPERBANDE
Vier modelle is vir die SuidAfrikaanse mark beskikbaar waarvan twee met rusperbande pleks van agterwiele toegerus is. Dit staan as die “Smarttrax”-stelsel bekend.
Modelle wat met wiele toegerus is, is die T8.350 (206 kW) en die T8.410 (250 kW). Albei dié modelle het dubbele voor- en agterbande, ’n groter brandstofvermoë, ’n nuwe swaardiensagteras op die T8.410 en ’n nuutontwerpte luginlaatstelsel.
Die hele reeks se ligte benut LED-tegnologie. Danksy voldoende beligting oor wye werktuie agter die trekkers, is langer werksure moontlik.
Al die trekkers in die reeks is met die nuutste fabriekgemonteerde satellietstuurstelsels toegerus. Dit sluit in ’n groot Intelliview-vierkleurraakskerm waarmee seksiebeheer, satellietstuur, wisselende toediening en verskeie trekkerfunksies beheer word. Die Centrepoint RTX-korreksiesein is vir een jaar gratis beskikbaar met die aankoop van so ’n trekker, en bied ’n akkuraatheid van 3,8 cm jaar ná jaar.
Die rusperbandmodelle is die T8.380 (229 kW) en die nuwe T8.435 (280 kW). Dié trekkers is toegerus met enkelvoorbande en twee rusperbandopsies agter – 24 duim wyd op die T8.380 en 30 duim wyd op die T8.435.
Demonstrasies het bewys die fynproewer verkies die T8-reeks omdat die hantering en gerief van ’n normale trekker saamgevoeg is met die vastrap en flottasie wat rusperbande bied. Kort draaisirkels sonder oormatige grondversteuring is net die begin van die lang lys voordele wat hierdie unieke trekkers inhou.
Die T8.435 is die eerste trekker in New Holland SA se stal wat met ’n palwissel (CVT)-transmissie toegerus is. Dit verseker die doeltreffendste verbruik van diesel vir die betrokke toepassing deur vier regstreekse koppelings tussen die 9 liter-enjin en die swaardiensagteras. Die transmissie dra by tot die gemak waarmee hierdie trekker hanteer kan word. Dit versnel moeiteloos sonder dat ratskakelings gevoel word.
Die Smarttrax-trekkers het ook kajuitsuspensie vir hope operateursgerief. Die wielglip is drasties verlaag met die rusperbande se groot spoor. Vier kontakpunte is deurentyd met die grond in aanraking.
SLIM AANDRYWING
Die rusperbande is die gevolg van jare se navorsing. Die groot aandryfwiel is hoër geplaas om ’n driehoekvorm te verkry, en só te lei tot die maksimum kontak met die rubberbelt. Wanneer die trekker oor ’n groot voorwerp ry, beskerm die rubbermonterings waarop die onderstel rus die stelsel. Gevolglik hou die belt baie langer.
Dit is maklik om olievlakke na te gaan danksy die olievlakglasies op die rusperband se gidswiele. 082 380 2405; www.nhsa.co.za