Slootgrawer is kompak, kragtig
Kubota se nuutste toerusting vir grondverskuiwing is nou in Suid-Afrika beskikbaar.
As jy na ’n oplossing soek vir bouwerk of grondverskuiwing in klein spasies, is die Kubota KX080-3S Superreeks 8 ton-slootgrawer met ’n skraper die ideale keuse.
Die KX080-3S kan bykans alles doen wat groter, konvensionele masjiene van dieselfde aard kan doen. Met sy kleiner, beweeglike raam en vastraprusperbande kan dié nuweling in die Kubota-stal in nou ruimtes slote en gate grawe. Vir die boer wat deurlopende instandhouding, bouwerk of grondverskuiwing op die plaas doen, is dit net die regte werktuig.
Een van die KX080-3S se eienskappe is sy eng “stertswaai”. Wanneer die kajuit swaai om met die graaf reg rondom die basis by te kom, sal die stertkant net effens oor die rusperbande swaai. Die kans om iets tydens die swaai-aksie raak te stamp is minimaal, en dit is steeds moontlik om in klein spasies te werk.
Die effense oorhang van die “stert” gee meer stabiliteit aan die KX080-3S, veral wanneer die lang arm van die graaf ver moet uitreik.
Die outomatiese luierfunksie is ’n nuwe toevoeging tot dié werktuig. Sodra die KX080-3S langer as vier sekondes in die neutrale rat is, skakel die enjin outomaties oor na luierspoed. Dit kan tot 10% brandstof bespaar en beperk die geraas van die enjin en uitlaatgasse.
Met die hidrouliese driepompstelsel het die operateur meer beheer, veral as die vrag in die graaf swaar is en presisiehantering vereis. Die arm, hefboom en swaai-as se onafhanklike hidrouliese pompe vergemaklik ook die hantering van die graaf.
Die masjien se 52,2 kW-dieselenjin het drie enjinkappe wat instandhouding aansienlik vergemaklik. tom@smithpower.co.za charl@smithpower.co.za; 011 284 2000.