KORINGPROJEK SKENK GROOT
‘N SAAIPROJEK op Porterville wat al 13 jaar lank bestaan, sorg dat nie net die landbousektor in die gebied “goeie oesjare” beleef nie, maar ook die dorp se kinders en bejaardes. Die inkomste uit die projek word verdien deur koring op ’n stuk meentgrond van 25 ha te verbou en die oes te verkoop.
Die Bergrivier-munisipaliteit stel die grond gratis aan die vereniging beskikbaar. Nou word ook beoog om kanola te plant.
Dié projek – wat in 2004 deur die Porterville-gemeenskapsvereniging begin is om behoeftige instansies by te staan – kon verlede maand R140 000 aan vier verdienstelike organisasies in die dorp skenk danksy verlede jaar se oes. Dit is die grootste skenking wat die vereniging tot nog toe gemaak het.
Die opbrengs van verlede jaar se oes was 2,973 ton per hektaar. Die geld wat met die oes verdien is, is vanjaar onder die Primêre Skool Porterville, die Hoërskool Porterville, Huis Nerina en die Christelike welsynsorganisasie Badisa verdeel.
Die skenkings is by die Kaap Agri-akademie op Porterville aan die begunstigdes oorhandig.
Volgens die Porterville-gemeenskapsvereniging is verskeie belanghebbendes en borge by die saaiprojek betrokke om onder meer kundige bystand te lewer en die sukses van die projek te verseker.
Inset- en diensverskaffers word betrek om onderskeidelik produksiemiddele en dienste, soos saad, kunsmis, chemiese middels, boekhoudingsdienste en kontrakwerk, te borg, hetsy gedeeltelik of volledig.
Volgens mnr. Cobie Liebenberg, ondervoorsitter van die gemeenskapsvereniging, is die dryfveer vir die projek die passie en deernis wat die betrokkenes vir hul gemeenskap het.
“Dit is nou meer as 12 jaar later en ons het nog elke jaar sukses behaal. Daar is nie ’n enkele komiteelid betrokke wat ’n sent vir hul werk kry nie,” het hy op die oorhandiging gesê.
Volgens me. Hanlie Linde, bestuurder van die Bergrivier-munisipaliteit, is die saaiprojek ’n voorbeeld van beste praktyk, naamlik ’n gemeenskap wat saamstaan.
–
Die borge wat die saaiprojek verlede jaar ondersteun het, is die Bergrivier-munisipaliteit, Kaap Agri, Sensako, Yara, Omnia, Viking, Wenkem, Inteligro, Syngenta, Bayer, RSA Agri Makelaars, Mutual & Federal, AG-Sprayers, Louw & Cronjé Geöktrooieerde Rekenmeesters en die Uitvlug-werkerstrust.