Plan teen besoedeling haak vas
REGULASIES wat volgens die witskrif oor klimaatsverandering reeds in 2013 aanvaar sou wees om maatskappye te verplig om hul uitlaatgasse aan die Regering verslag te doen, is nóú nog nie ingestel nie.
Die Parlement se portefeuljekomitee vir omgewingsake moes onlangs hoor die enigste gesaghebbende data oor lugbesoedeling dateer uit 2010.
“Daar was geen wetlike vereiste vir maatskappye om data te verskaf nie. Die verantwoordelikheid was geheel en al die Regering s’n,” het mnr. Hilton Trollip, senior navorser vir energie, omgewing en klimaatsverandering by die Energienavorsingsentrum van die Universiteit van Kaapstad gesê.
Hy het gesê as die Regering uitlaatgasse wil beheer, sal hy moet weet wie die gasse afskei. Die voorgenome verslagdoenstelsel sou die hoeksteen vorm van pogings om lugbesoedeling te verminder.
Dié soort verslagdoening geld reeds in China, Amerika en Australië. Die Verenigde Nasies publiseer op sy webwerwe inligting oor hoe om só ’n verpligte verslagdoeningsprogram in te stel.
TEIKENS
Me. Hildah Nyambi, ANC-LP, het gevra dat as die land nie ’n ferm greep op die data van uitlaatgasse het nie, hoe sal die Regering ooit weet of die land binne of buite die mikpunte vir uitlaatgasse is?
Mnr. Mohlopi Mapulane, voorsitter van die komitee, het gesê maatskappye wat plaaslik en in Amerika sake doen, kan hul uitlaatgasse daar aanmeld. Hulle kan nie verkwalik word as Suid-Afrika geen wetlike vereiste daarvoor het nie.
“Die kwessie waarmee die Regering sit, is die opstel en toepassing van regulasies en hoe die Regering die inligting kan bekom wanneer maatskappye weier om dit te verskaf,” het Trollip gesê.
Me. Nosipho Ngcaba, direkteur-generaal van Omgewingsake, het gesê die stelsel vir die vermindering van uitlaatgasse sal oor ’n tydperk ingefaseer word. Die eerste fase 2016 tot 2020 is die gidsfase waar geen wetlike instrument dit sal onderskraag nie en maatskappye hul inligting vrywillig kan indien.
Vanaf 2021 tot 2025 sal wetgewing ingestel word en sal die verskaffing van data oor uitlaatgasse verpligtend wees.