Die kuns van kuilvoermaak is op 22 Februarie gevier tydens die kroning van die Santam Landbou Kuilvoerkoning vir 2016 in Centurion in Gauteng.
Intensiewe veeproduksie steun swaar op kuilvoer van goeie gehalte en die Kuilvoerkoningkompetisie moedig boere aan om hul inkuilingstegnieke te verbeter. Die algehele wenner is Van Greunenboerdery buite George in die WesKaap. Mnr. Bennie van Greunen het die prys namens die boerdery ontvang. Die Van Greunens boer onder meer met melkbeeste en was die wenner in die afdeling vir mieliekuilvoer.
Die Westendlandgoed buite Morgenzon in Mpumalanga se voersorghumkuilvoer was die beste. Dié landgoed boer intensief met Holsteinmelkbeeste, Drakensbergers en Merino’s.
Die beste hawerkuilvoer is op Klipheuwel by Philadelphia in die WesKaap deur JH Blanckenberg gemaak. Mnr. Philip Blanckenberg, wat dié melkplaas bestuur, het die eerbewys ontvang.
Maar nie net melkboere maak goeie kuilvoer nie. Mnr. Marnus Pretorius van Mafunyane in Noordwes se wildplaas en kwarantyngeriewe is op ’n redelike klein stuk grond geleë. Om deur die jaar genoeg voer vir wild te lewer, maak hy mieliekuilvoer. Hy was tweede in dié afdeling.
KUILVOER SA
Mnr. Richardt Venter van die konsultasiemaatskappy AgSci Unlimited is opgewonde oor die bydrae wat die kompetisie lewer om kuilvoergehalte te verbeter.
Hy is ook die voorsitter van die nuutgestigte Kuilvoer SA, wat die mandaat het om die kompetisie uit te bou. Hulle wil kuilvoergehalte verbeter deur klem te lê op wat goeie kuilvoer behels en mense in goeie praktyke te onderrig. Kuilvoer SA wil relevante, plaaslike studies doen om data in te samel, soos wat die Santam Landbou Kuilvoerkoningkompetisie regkry.
“Tans is die lede van Kuilvoer SA almal wat boer of hulself inskryf vir die kompetisie. Almal wat in die afgelope drie jaar deelgeneem het, word genooi om in te skakel. Dié drie jaar se wenners word genooi om deel te word omdat ’n sterk boereaanslag en inset vir Kuilvoer SA belangrik is. Die behoefte aan ’n organisasie soos Kuilvoer SA is as ’t ware uit die kompetisie gebore,” sê hy.
Volgens hom het groei in die land se kuilvoerbedryf ’n behoefte laat ontstaan om bymekaar te kom op “neutrale grond” waar almal objektief oor kuilvoergehalte en neigings kan gesels.
“Kuilvoer SA sal die SuidAfrikaanse boer toegang gee tot objektiewe menings, gegrond op plaaslike data, om hulleself te kan bemagtig om kuilvoergehalte te verbeter,” sê Richardt. co.za; richardt@agsci. 083 590 3014.