Negosiewinkel met ’n kunstige streep
Marilise Lombard se Paddavlei Kunsgoete-winkel op Riversdal is ’n unieke kombinasie van kuns, kos, klere en entrepreneurskap vir kunsliefhebbers en besoekers.
Beskryf jou onderneming in ’n neutedop. Paddavlei is gebore uit die behoefte aan ’n studio waar ek kon skilder. Dit het gelei tot kunsklasse, naaldwerk en vele meer. Vandag is Paddavlei Kunsgoete my ateljee, asook ’n kunsskool, kunswinkel, koffiewinkel en tuisnywerheid vir Riversdal se entrepreneurs. Ons maak klere en gordyne en doen ook raamwerk. Hier is gebak, hekelwerk, kralewerk, oorbelle van koeldrankdoppies, pragtige houtwerk, skilderye, klere en meer.
Was kreatiwiteit nog altyd in jou bloed? Ek het voorheen in Benoni gebly, waar ’n dominee my gevra het om vier panele vir die kerk te maak. Ek het nog nie geskilder nie, maar hy het my verseker ek kan die taak aanpak. Ek het die panele gemaak terwyl ons ingepak het om na ’n plaas naby Riversdal te verhuis. Die elf jaar ná die droogte in 1994 was moeilik en ek het ’n ekstra inkomste nodig gehad. Iemand het my skilderye raakgesien en dit in 1997 na ’n handelskou in Duitsland geneem. In 2004 het Jong Dames Dinamiek my gevra om hul dagboek te illustreer en daarna het ek ernstig begin skilder.
Hoeveel mense werk vir jou? Hettie (sien foto) se hande staan vir niks verkeerd nie; sy kook, verf, hekel, brei. Magdaleen toor met ’n naamasjien en Shaida bedien die mense. Ons werk sy aan sy saam. As daar min kombuiswerk is, verf of brei ons, of doen wat ook al ons hande vind om te doen! Mense met gestremdhede wat lapverf- of mosaïekwerk kan doen, verskaf ook vir ons produkte en kry so geld vir hul handwerk. Plaaslike mense, oud en jonk, verkoop ook hul handwerk hier.
Hoe het jy die besigheid gefinansier? Ons eerste plekkie was baie klein en ons het met byna niks geld begin nie. Sonder my oulike, flukse eggenoot, Christo, sou ek dit nie kon doen nie. Ons het gratis planke by die saagmeule gekry en rakke gebou, pale op plase gaan saag en gereeld inkopies by die skrootwerf gaan doen. Ek het met kunsklasse begin, steeds geskilder en die meeste van die produkte self gemaak.
Hoe oorleef julle stiller tye? Ons bly produktief en bak, brei of verf. Op die platteland is besigheid soms stil. Dan soek ons ander afsetgebiede, soos om by ander winkels en kersmarkte te verkoop, uitstallings te hou en skilderye aan galerye te voorsien. LINKS:
Hoe help jou onderneming die gemeenskap? Ek help met kunslesse vir mense met gestremdhede by Goukam Health. Ons is betrokke by Riversdal se toerismevereniging en doen ons bes om toeriste na ons pragtige dorp te lok. Ek gee demonstrasies by verskillende verenigings en doen uitstallings by die biblioteek. Ek verf nou onder meer die Miernes-kleuterskool se mure. Ek skenk ook skilderye vir geldinsamelings aan die ouetehuis, Voortrekkers en die Lekkerlaggies-kleuterskool.
Wens jy daar was iets wat jy geweet het voordat jy met die onderneming begin het? Dit is ’n uitdaging vir ’n kunstenaar om te beplan en daarby te hou. Gelukkig is my personeel staatmakers en hou hulle kop! Dit is uiters noodsaaklik om te beplan en take te delegeer met spesifieke werksopdragte vir spesifieke tydgleuwe. Dit het tyd gekos, maar nou werk dit klopdisselboom. Bemarking is noodsaaklik. 074 034 0352
Is jy ’n vrou met jou eie onderneming op die plaas of die platteland of ken jy ’n dinamiese vrou wat dit doen? Ons wil graag hoor van jou sukses. Stuur e-pos aan Lucille Botha by lbotha@landbou.com om ons van jou onderneming te vertel.