LAER MIELIEPRYSE HELP VOERKRALE
VOERKRALE se syfers lyk deesdae beter danksy hoër karkas- en laer mieliepryse nadat hul somme voorheen moeilik geklop het, sê mnr. Ulrich Müller, tegniese bestuurder van Voermol.
Müller het op die Voermolboeredag op Vryburg verduidelik dit is moeilik om met ’n speenkalf wins te maak as die mielieprys hoog is, want in die 120 dae wat ’n speenkalf normaalweg in die voerkraal deurbring, vreet hy sowat 1,2 ton voer. Dit bestaan uit 880 kg mielies, 200 kg konsentraat en 120 kg hooi. Mielies word moeilik met hooi vervang en hooi lewer dus nie juis ’n bydrae nie. Die konsentraat vul die proteïen aan.
’n Voerkraal begin met ’n speenkalf van sowat 220 kg, wat tot op ongeveer 440 kg gevoer word. Baie kalwers word egter eers op die veld uitgegroei, beland op ’n hoër gewig in die voerkraal en word dus vir ’n korter tyd gevoer.
Die hoogste produksiekoste is die kalf (64%), gevolg deur konsentraat en ruvoer (30%) en prosessering, staankoste, vrektes en bemarking (6%). Baie boere met plaasvoerkrale lewer hul eie mielies en speenkalwers en voeg sodoende waarde toe.
70DAE
Wins word deur drie faktore bepaal, naamlik die prys van die speenkalf, van vleis en van mie- lies. Die speenkalfprys moet 65% laer as die vleisprys wees om wins te maak en 1 kg vleis moet meer as 12 kg mielies kan koop.
Wins staan op twee bene, naamlik voer- en aankoopmarge.
“As dit goed gaan, is die voermarge gunstig, maar die aankoopmarge is altyd ongunstig. Jy betaal dus meer as die waarde van die speenkalf, maar hy groei daarna. As die kalf teen R28/kg aangekoop word, bedra dit R6 160. Om gelyk te speel, moet die kalf 70 dae in die voerkraal bly. Dan is daar nóg 50 dae oor om wins te maak.