Afrikanerstoetery behaal vyfkuns
Deelname aan handelsmerkbemarking en die streng navolging van teeldoelwitte is kenmerke van die stoetery wat vanjaar die Afrikanerras se voorste Elitekoei opgelewer het — die vyfde jaar agtereenvolgens.
Grootkuil-Afrikaners is een van Suid-Afrika se oudste beeskuddes en word sedert 1951 deur die Cronjé-familie bedryf. Mnr. Pierre-André Cronjé bestuur die kudde, en die familie se gemengde boerdery in die distrik Theunissen word saam met sy broer, Gerhard, behartig.
Deur jare se toegewyde teling en die noukeurige byhou van produksie-aantekeninge het die stoetery die topvlak bereik.
Die ideale Grootkuilkoei het goeie bespieringseienskappe, goeie spene en ’n goeie loopvermoë. Pierre-André verkies ’n wigvormige bou, en uiteraard is koeie se reproduksieprestasie van die grootste belang.
Benewens voortgesette prestasie-aantekening skryf Pierre-André die stoetery se besonderse vrugbaarheid ook toe aan hul twee kalftye per jaar, ’n bestuurspraktyk wat hul pa, wyle mnr. Johan Cronjé, ingestel het. Die kalftyd in die winter duur slegs twee maande en in die somer strek dit oor vier maande. Die kalwers word in twee prestasietoetsgroepe ingedeel. Hoewel Pierre-André die somerkalftyd in normale jare verkies wanneer meer weiding beskikbaar is, is een voordeel van die winterkalftyd dat dit die kudde se tussenkalfperiode (TKP) verkort het. Verse word op 18 maande oud laat dek. Dié wat nie dragtig raak nie, word vyf maande tot ses maande later weer by die bul gesit. As hulle dan nie dragtig is nie, word hulle uitgeskot.
KLIMAATSVERANDERING
Afrikanereienskappe sluit in geharde veldaanpasbaarheid, ’n gladde vel, ’n goeie loopvermoë, asook rompkapasiteit. Pierre-André wil ook graag die bosluisweerstandigheid en hitteverdraagsaamheid van die ras in sy teling behou. “Deesdae word baie klem op hitteverdraagsaamheid gelê teen die agtergrond van aardverwarming. Daar is ’n groot vraag oorsee na diere wat dié eienskap het.”
Embrio’s van vorige Elitekoeiwenners en semen van uitgesoekte bulle in die kudde is tans beskikbaar – ook vir uitvoer waar wetgewing dit toelaat. Hy reis ver vir geskikte teelmateriaal. Sy ideale bul moet sterk groei- en bespieringseienskappe hê. Hy let veral op na die dier se reproduksieteelwaardes.
Hy maak self sy osse op die veld groot. Ná speentyd oorwinter die osse op die aangeplante groenvoer. Ná ’n somer op die veld word hulle in die daaropvolgende winter stuk-stuk onder die Afrikaner se geregistreerde AfriBeef-handelsmerk bemark as hulle 20 maande tot 24 maande oud is.
WENKOEI SE EIENSKAPPE
MC 060260 is ’n nasaat van die bul Karstveld Veldsman wat deur mnr. Christo Mouton van Namibië geteel is. Sy is nou 11 jaar oud en het agt kalwers opgelewer met ’n TKP van 393 dae. Sy het op die ouderdom van 30 maande die eerste keer gekalf. In 2011 het sy een somerdekking oorgeslaan ná die winterkalftyd, maar sedertdien elke winter gekalf. Sy is tans swaar dragtig en sal teen druktyd reeds haar negende kalf hê.
Sy is ’n besonder breë koei met baie goeie kapasiteit. Drie van haar verskalwers is in die kudde en het reeds nageslag van hul eie. Hulle is ook baie vrugbaar. Twee van haar bulkalwers is aan medetelers op veilings verkoop, met die jongste kalwers wat ook goed lyk en in die kudde opgeneem sal word.
MC 060260 se besonderhede verskyn in die TABEL hiernaas.