DIÉ WEEK IN DIE LANDBOU
DUUR STRAF
’n Senior dosent van die Landboukollege Grootfontein in die Oos-Kaap is ’n skorsing van drie maande sonder betaling opgelê in ’n prosedureel twyfelagtige tugproses wat vloei uit ’n onderonsie tussen die twee vakbonde op dié kampus, Nehawu en die PSA. Dié vonnis teen dr. Johann van Rooyen volg nadat hy by mnr. Senzeni Zokwana, Minister van Landbou, Bosbou en Visserye, geappelleer het teen sy aanvanklike straf van ’n posverlaging en ’n finale waarskuwing. Dié stap sal hom byna R200 000 kos. ’n Appèl oor die tugsaak dien volgende maand voor die staat se bedingingsraad.
FEEDMASTER VERNUWE
’n Belegging van R31 miljoen sal die Namibiese veevoervervaardiger Feedmaster se produksie verdubbel. Bouwerk aan ’n nuwe aanleg in die noorde van Windhoek sal na verwagting in September voltooi wees. Mnr. Ian Collard, besturende direkteur, sê die uitbreiding is om in die groeiende vraag in die herkouermark en presisieboerdery te voorsien. Die nuwe aanleg sal 20 ton voer per uur kan behartig en 10 ton voerkorrels per uur kan vervaardig. Feedmaster en Veekos, sy filiaal in Suid-Afrika, verkoop jaarliks sowat 160 000 ton veevoer en het ’n omset van R800 miljoen.
NUWE WYNHEFFINGS
Statutêre heffings op alle wyndruiwe wat van volgende jaar tot in 2021 sal geld, is onlangs vir kommentaar deur die Nasionale Landboubemarkingsraad gepubliseer. Die huidige heffings, wat aangewend word vir navorsing en ontwikkeling, verslagdoening, transformasie en die ontwikkeling van uitvoermarkte, verval op 31 Desember. Die heffings beloop tans tussen 40c en R21 per ton druiwe, na gelang van waarvoor dit aangewend word. Op die meeste klasse wyn is drie of vier heffings van toepassing. Besoek www.
namc.co.za vir die nuwe heffings en stuur kommentaar aan mathilda@ namc.co.za.
GRONDGRYP GEFNUIK
’n Groep vermoedelik voornemende grondbesetters is op 7 April in Witrivier van onontwikkelde munisipale grond verdryf danksy samewerking tussen die polisie en die plaaslike AfriForum-buurtwag. Dié burgerregteorganisasie sê daardie oggend voor 10:00 was daar al nagenoeg 40 voertuie en ’n aantal EFF-ondersteuners met grawe, kapmesse, pale en stokke op dié stuk grond. Lede van AfriForum het verkeer weggelei van die byeenkoms en die polisie bygestaan deur die groep se bewegings met ’n ligte vliegtuig te monitor. Regstappe teen die EFF kan volg as AfriForum kan bevestig dat die organiseerder van die grondgryppoging wel ’n EFF-lid is, want dit is strydig met ’n interdik oor grondvergrype teen die EFF.
KAAPSE TONNELS
’n Ontwikkelingsinisiatief in Philippi op die Kaapse Vlakte bou tans 2 500 m2 se kostonnels om nuwe boere in dié gebied op te lei. Die Philippi Economic Development Initiative se akademie sal bestaan uit tonnels vir boedery en saailinge. Van die beddings word reeds beplant as deel van die opleidingsprogram, wat organiese boerdery en sake-ontwikkeling sal insluit. Dié landbougebied is onder druk van eiendomsontwikkelaars weens ’n erge behuisingstekort in Kaapstad, maar die Stad Kaapstad is onder die borge van die projek.
MEGABOER STERF
Mnr. Barries Snijman (48) van Rietbron, ’n voorste Angoraboer, is kort voor druktyd skielik oorlede. Hy was ondervoorsitter van die Sybokhaartrust en het van 1997 tot 2009 in die Suid-Afrikaanse Sybokhaarkwekersvereniging se bestuur gedien. Hy was ’n vennoot van Samil Farming op Rietbron wat met meer as 17 000 Angoras boer. Hy was een van die boere wat in die TV-reeks Megaboere op kykNET verskyn het. Hy is gedurende sy loopbaan met verskeie eerbewyse in die Daidoh-, Miyuki- en Graaff Zegna-kompetisies bekroon. Hy sal veral onthou word vir sy passie vir die sybokhaarbedryf en kalme beredenering wanneer humeure tydens vergaderings opgevlam het, sê bedryfsleiers. Snijman word oorleef deur sy vrou, Mauritzia, twee seuns, Ben-Johan en Wouter, en sy ouers, Johan en Johanna.