ZEDER GROEI IN WAARDE

KAAP Agri, Zaad en Agrivision was die voorosse wat Zeder die afgelope boekjaar gehelp het om die wa deur die finansiële drif te trek.

Zeder, wat hoofsaaklik in die landbou-, voedsel- en drankbedryf belê, het verlede Maandag sy resultate bekend gemaak vir die boekjaar wat op 28 Februarie tot ’n einde gekom het. Die belangrikste aanwyser van dié beleggingshouermaatskappy se waarde en prestasie, die somvan-die-dele-per-aandeel, het in die afgelope boekjaar met 23,1% gestyg tot R8,53 per aandeel. Die som van die dele bestaan uit die gekwoteerde markprys van alle JSE-genoteerde beleggings en markverwante waardasies van ongenoteerde beleggings.

Veral Pioneer Foods, Capespan en Quantum het in die afgelope boekjaar op moeilike handelswaters gevaar. Die sterre in die Zeder-stal was Kaap Agri, Zaad en Agrivision.

Zeder se totale onderliggende beleggingsportefeulje beloop nou R15,2 miljard. ’n Jaar tevore was dit R12,4 miljard werd.

‘AANVAARBAAR’

Aandeelhouers sal ’n finale dividend van 11 sent per aandeel ontvang. Dis ’n verbetering van 22,2% teenoor die 9 sent wat in die 2016-boekjaar verklaar is.

Luidens ’n mediaverklaring het Zeder se herhalende wesensverdienste per aandeel met 0,5% tot 42,6c gestyg.

“Gegewe die moeilike bedryfsomgewing in die sektor en veral die uitwerking van die onlangse droogte, word dit as aanvaarbaar beskou.”

Mnr. Norman Celliers, uitvoerende hoof van Zeder, reken die resultate is bevredigend, veral as die moeilike makrosiklus in ag geneem word. Volgens hom het die maatskappy verwag dit sou moeilik wees om verdienste te laat styg. Daarom is hy tevrede met ’n sywaartse beweging.

“Gesien vanuit ’n waardasie-oogpunt is bemoedigende resultate gelewer, met die onderliggende beleggings wat in waarde toegeneem het. Vanuit ’n verdienste-oogpunt gaan ons egter voort om aktief na volhoubare groei in verdienste op middel- en lang termyn te streef.”

KAAP AGRI BELOWEND

Kaap Agri, wat onlangs sy voorneme aangekondig het om op die JSE te noteer, sal veral belangrik wees vorentoe. Celliers sê hulle het aansienlike vordering gemaak met die struktuur en diversifikasie van die maatskappy om ’n aantreklike notering te verseker. “Kaap Agri se produkstrategie en geografiese diversifikasie bied goeie vooruitsigte vir die toekoms, terwyl sy onlangse klem op die toevoeging van nie-landbouverwante inkomstestrome en die verbetering van doeltreffendheid vastrapplek gekry het.”

Celliers meen beleggings in die sektor sal aanhou om goeie opbrengste te bied.

‘Die maatskappy het verwag dit sou moeilik wees om verdienste te laat styg.’