RUSSE EET SAKKE VOL LEMOENE
NAAS appels is sitrus die gewildste vrugtesoort in Rusland, met ’n verbruik van meer as 11 kg per persoon per jaar.
Volgens mnr. Michail Fateef (foto), ’n konsultant oor die Russiese mark vir die Suider-Afrikaanse Sitruskwekersvereniging, is veral Valencias en nawels (telling 56-72) wat in 1 kg-sakkies teen $1 verkoop word, gesog.
Fateef het op die onlangse sitrusberaad in die Baai gesê omdat sitrus weens klimaatstoestande nie in Rusland gekweek kan word nie, is die land heeltemal afhanklik van invoer.
Rusland is die wêreld se grootste invoerder van mandaryne (730 000 ton), die naasgrootste invoerder van lemoene (480 000 ton) en pomelo’s (120 000 ton), en naas Amerika en die Europese Unie (EU), die grootste invoerder van suurlemoene (190 000 ton).
Turkye is Rusland se grootste verskaffer (lemoene, mandaryne, suurlemoene en pomelo’s), dan Marokko (mandaryne en lemoene), Egipte (lemoene) en Suid-Afrika (suurlemoene en pomelo’s). Dié lande ontvang ’n rabat van 25% op invoertariewe. Weens sanksies teen die EU voorsien Spanje nie meer vrugte aan Rusland nie.
Fateef het gesê die verbruik van suurlemoene het op nagenoeg 200 000 ton gestabiliseer en sowat 55% daarvan word deur Turkye voorsien, gevolg deur Argentinië, Suid-Afrika en China.
In teenstelling met die EU is swartvlek nie ’n fitosanitêre kwessie vir die Russe nie. Die Mediterreense vrugtevlieg Ceratitis capitata is wel.
PRYS
Sowat 70% van alle sitrus word in supermarkte verkoop. Kettingwinkelgroepe, soos Magnit en Pyaterochka, bestel hul vrugte regstreeks van Suid-Afrika. Hy sê Russiese verbruikers is onder druk weens sanksies en ’n swak roebel en is meer op prys ingestel as op gehalte van vrugte.
Burokrasie het veral kleiner Suid-Afrikaanse uitvoerders swaar getref. Een só geval is die plakkers wat sedert Februarie 2015 kragtens regulasies van die Eurasiese ekonomiese kommissie sekere besonderhede, soos die land van herkoms, produsent en raklewe, moet bevat en op elke vrug aangebring moet word.
Fateef het ’n emosionele pleidooi gelewer dat Suid-Afrikaanse uitvoerders nie die rug op Rusland keer nie en die hoop uitgespreek dat presidente Jacob Zuma en Wladimir Poetin, wanneer hulle weer ontmoet, die kwessie van plakkers op vrugte sal bespreek en die reëling opgehef kry. Hy meen veral opkomende sitrusprodusente sal daarby baat vind. –