EET VAN VLEIS IS GOED VIR OMGEWINGS

Van waar tog die bohaai dat ’n dieet met vleis en ander diereprodukte sleg vir moeder aarde en haar klimaat is?

Om lewende hawe sleg te sê, is gelykstaande daaraan om veeboerdery se noodwendige rol in die volhoubare toekoms van die planeet te ontken.

Só sê dr. Shirley Tarawali, assistent-direkteur-generaal van die internasionale navorsingsinstituut vir lewende hawe (ILRI). Sy sê daar is hope redenasies te voer vir die omgewingsvriendelike eet van vleis, melk en eiers. Shirley lig ’n paar feite uit: Vleis en melk word internasionaal op wyd uiteenlopende maniere gelewer. Die manier waarop skape en beeste in Amerikaanse voerkrale afgerond word, is ’n heel ander wêreld as waarin in Afrika suid van die Sahara met diere geboer word. Vir elkeen van hierdie produksiepraktyke is daar, gegewe die plaaslike klimaat en toestande, ’n stel van beste praktyke. In die ontwikkelende wêreld is boerderystelsels wat ’n baie lae omgewingsimpak het, en wat ook tot die doeltreffende en voordelige hersirkulering van voedingstowwe bydra. Kossoorte vanaf lewende hawe kan vriendelik vir die omgewing en die klimaat wees. Hoewel die sektor in sy geheel volgens internasionale beramings tot kweekhuisgas-uitskeidings bydra, gebruik die meeste ontwikkelende lande tans beramings wat vir stelsels in Noord-Amerika, Europa en Australië geld. Vanweë die groot verskil in boerderystelsels en hoe vee gevoer word, is daar egter reuseverskille in veekuddes se koolstofspoor in verskillende produksiestreke. “’n Derde van die wêreld se grond is net vir veeboerdery geskik. Waar dit versigtig bestuur word, is mediumvlakke van beweiding inderwaarheid beter as geen. In ’n onlangse studie is byvoor- beeld bevind dat diëte wat diereprodukte insluit, doeltreffender vir grondbenutting is as vegan-diëte.” Matige hoeveelhede kosse afkomstig vanaf diere kan beter vir die mens se gesondheid wees as ’n suiwer vegetariese dieet. Talle mense in die geïndustrialiseerde wêreld eet byvoorbeeld te veel vleis, maar dit is ’n sleutelbron van onder meer energie, yster en vitamien B12 vir talle mense in die ontwikkelende wêreld. Melk en suiwelprodukte speel ook ’n deurslaggewende rol om wanvoeding te verhoed. Lewende hawe en saaiboerdery is van mekaar afhanklik. Dit is ’n misvatting dat gewas- en veeproduksie in afsonderlike stelsels geskied. Gemengde gewas-en-veeboerdery kom algemeen oor die hele wêreld voor en bied wonderlike geleenthede om hulpbronne te kombineer, inkomste te diversifiseer en die voordele van die landbou te vergroot. Oesreste word aan vee gevoer en mis word vir bemesting benut. In een studie is bevind mis vanaf vee verskaf 12% van die stikstof wat jaarliks vir wêreldwye gewasproduksie gebruik word. Gemengde boerderye voorsien nie net in die wêreldwye vraag na diereprodukte nie, maar lewer ook rondom die helfte van die wêreld se grane. Dit sluit byvoorbeeld meer as 40% van die mielies in. –

FOTO: JOHN BOULLE Aktiviste moet ophou kerm oor die eet van vleis en ander diereprodukte. Goedbestuurde veeboerderye, soos dié van mnr. Philip Barnard van die plaas Mequatling by Clocolan, vorm ’n integrale deel van boerderyekostelsels en is onlosmaaklik verbind aan ’n...