NUWE NAVARA LYK SOOS ’N RÉGTE BAKKIE
Die langverwagte nuwe Nissan Navara-4x4-dubbelkajuitbakkie is in Suid-Afrika bekend gestel, amper twee jaar ná die res van die wêreld. ALBERTUS VAN WYK was daar.
Die vertraging om die Navara in Suid-Afrika te kry het dalk te doen met die swak wisselkoers – die bakkie word in Thailand gebou – maar Nissan Suid-Afrika het dié tyd goed gebruik om die bakkie behoorlik en uniek vir Suid-Afrikaanse toestande voor te berei.
Dit het aansienlik beter veld- en plaasryvermoëns as sy voorgangers, sonder dat die vering, bande of buffers vervang hoef te word.
Die bakkie se grondvryhoogte is byvoorbeeld 20 mm hoër (229 mm) as sy oorsese broers, wat natuurlik ook sy oorbruggings(25,2 °), invals- (33 °) en vertrekhoek (27,9 °) verbeter. Die grondvryhoogte is egter 57 mm minder as die Toyota Hilux s’n, maar darem 9 mm hoër as die soortgelyke Isuzu-bakkie s’n.
Ten spyte daarvan dat dit op die oog af kleiner lyk as die vorige Navara-model, is die bak in der waarheid 67 mm langer en 18 mm dieper. Dit kan ook ’n ware ton (1 002 kg) dra, wat amper 200 kg beter is as die nuwe Hilux (810 kg), maar soortgelyk aan die Isuzu. Die sleepvermoë (3 500 kg met geremde sleepwa) is dieselfde as die Hilux en die Isuzu s’n.
HOE LYK HY?
Met die eerste oogopslag is die Navara nie te onaardig nie en ná ’n dag groei die bakkie se voorkoms nogal op ’n mens. Die rooster en neus is onmiskenbaar Nissan, hoewel die ontwerp sterk wegstuur van die vorige Navara se American truck-tipe hoekigheid en pronkerigheid, wat gemaak het dat talle van die vorige modelle in die stede mettertyd met donker vensters, laeprofielbande, laer vering en chroomvellings gepronk het.
Hy lyk ’n bietjie meer soos ’n ware bakkie en het meer gemeen met die ou Hardbody net ná die eeuwisseling en ander Japannese bakkies, as met sy voorganger.
Die nuwe Navara kom aanvanklik net met ’n dieselenjin uit – ’n 2,3 liter met drukbuis-inspuiting en twee turbo’s: ’n kleiner hoëdrukturbo en ’n groter laedrukturbo. Nissan sê die turbo’s werk saam om beter krag deur die hele revolusiespektrum te lewer – die kleiner turbo werk harder teen lae revolusies en die hoë turbo gee gas teen hoë revolusies.
Die enjin lewer 140 kW teen 3 750 r/min. en 450 N.m wringkrag tussen 1 500 r/min. en 2 500 r/min.
Nissan sweer by ’n brandstofekonomie van 6,5 liter vir elke 100 km, wat merkwaardig en waarskynlik aan die optimistiese kant is, maar sekerlik nie ’n duimsuigery nie aangesien motormaatskappye tans redelik fyn trap in die nadraai van die brandstofskandaal.
’n Groot deel van die beter verbruik is dalk te danke aan ’n gewigsverlies van ’n allemintige 176 kg teenoor die vorige model, te danke aan slim werk by die bouery en nuwe soorte ligter staal in die leerraamonderstel. Dis baie gewig – 176 kg is twee hele brandmaer boere wat nie meer saamry Nampo toe nie!
VERING-REVOLUSIE
Dis dalk bietjie dik vir ’n daalder om die gebruik van kronkelvere op ’n vaste agteras op ’n bakkie revolusionêr te noem, maar dis inderdaad die eerste bakkie in Suid-Afrika wat nie bladvere op die agteras het nie. Hy dra steeds ’n ton, maar die verskil in rygemak en padhouvermoë is dadelik merkbaar.
Nissan se manne reken die probleem met ’n agterent wat rondwip op ’n sinkplaatpad as die bak leeg is, is opgelos, maar dis nou nie heeltemal so drasties nie. As die bakkie leeg is, loop die stert steeds bietjie rond op hoë spoed, maar dis inderdaad veel beter.
Om jou verder op die pad te help bly, is daar ’n hele boel outomatiese elektroniese bestuurshulpmiddele, waarvan die progressiefste die sogenoemde ABSL-stelsel is – aktiewe rem beperkte gly-as-ewenaarstelsel, wat ’n kombinasie is tussen ’n ou ABS-remstelsel en ’n beperkte gly-as-ewenaar wat kragverspreiding in onder meer tydrenkarre beheer. Kortom, jy het ’n redelik sterk mengsel van spoed, verwaandheid en roekeloosheid nodig om die nuwe Navara van die pad af te laat loop.
ENKELKAJUIT EN 4X2?
Die eerste 4x2-modelle behoort Suid-Afrika einde vanjaar te bereik en enkelkajuite eers einde volgende jaar, of selfs later. Gerugte loop sterk dat die enkelkajuit én die dubbelkajuit in die toekoms by Nissan se aanleg by Rosslyn in Pretoria gebou gaan word.