Bloemskou nét die plek vir veetelers
Bloemskou word van 27 April tot 7 Mei gehou. Meer as 4 000 diere sal vertoon word by dié grootste enkele skougeleentheid vir lewende hawe in Suid-Afrika.
Die Bloemskou spog weer met ’n propvol landbouprogram. Besoekers kan uitsien na een wêreldskou, tien nasionale en agt plaaslike, streeks- en provinsiale landboukampioenskappe vir perde, beeste, skape en bokke. Dié skou word van 27 April tot 7 Mei in Bloemfontein gehou.
Die hoogtepunte op die kleinveekalender sluit vier kampioenskappe, een wêreldskou en een nasionale veiling in: 27-28 April: Merino Classic nasionale kampioenskap. 28-29 April: Nasionale skaapskeerkampioenskap. 29 April: Merinolandskaap nasionale kampioenskap. 29 April: Suffolk-streekskampioenskap. 1-4 Mei: Wêreldskou vir Boer-, Savanna- en Kalahari Redbokke. 5 Mei: Nasionale veiling vir Boer-, Savanna- en Kalahari Red-bokke.
SKAAPSKEER
Die wolle gaan waai in die spoedskeerkompetisie (28 April om 18:00), wat deel is van die nasionale skaapskeerkampioenskap in die Skeerkompleks. Die beste handskeerders en skeerders met elektriese skaapskêre sal meeding.
Algemene skaapskeerdemonstrasies word ook gehou.
WÊRELDSKOU
Die Boerbok-, Kalahari Red- en Savanna-wêreldskou word van 1 tot 4 Mei aangebied. Na verwagting sal bykans 60 vertoners meer as 1 130 bokke vir die Wêreldbokskou inskryf. Die grootste verteenwoordiging is uit die Boerbokgeledere met 45 vertoners en 871 Boerbokke wat reeds ingeskryf is.
Mnr. Gawie Kleinhans sal die aankondiger tydens die skou wees. Drie beoordelaars behartig telkens die beoordeling gesamentlik. By die Boerbokke sal mnre. Braam Maritz, Lukas Burger en Koenie Kotzé die wenners kies en mnre. Joubert van der Merwe, Vaatjie Nell
en Josef Kleynhans sal die Kalahari Red- en Savannabokke beoordeel.
Die prysuitdeling is op 4 Mei. Die volgende dag sal van die diere op ’n veiling te koop wees. Tot dusver is meer as 40 ramme en 75 ooie vir die veiling ingeskryf.
MERINOLANDSKAAP
Die Merinolandskaap-genootskap bied sy nasionale kampioenskap en kuddekompetisie op Saterdag 29 April aan.
Die genootskap vier vanjaar die 60ste jaar sedert die eerste Merinolandskape van Duitsland af ingevoer is. Dié geleentheid word ná die nasionale kampioenskap gevier. Die skou se prysuitdeling word ook tydens die vieringsgeleentheid gehou.
Kom kuier saam en ontmoet mnr. Dirk du Plessis van Kop- pies wat 60 jaar gelede die eerste diere van dié ras op die skip vergesel het.
SLAGLAMKOMPETISIE
Die Rooivleisprodusente-organisasie in die Vrystaat en die Bloemskou nooi alle skaapboere om deel te neem aan die slag- lamkompetisie wat van 25-29 April gehou word. Inskryfgeld beloop R50 per lam. Die inskrywings word in groepe van vier gedoen, dus is die inskryfgeld vir vier lammers R200 per groep. Inskrywings sluit op 21 April.
■ 27 April: Beoordeling word deur Samic behartig, waarna die wenkarkasse na die Bloemskou geneem word.
■ 28 April: Prysuitdeling by Die Padstal by die Bloemskou. 29 April: Die wenkarkasse word by Die Padstal opgeveil.
SIEN JOU DAAR!
Kaartjies is te koop by Computicket-verkoopspunte of aanlyn op die webwerf online.compu ticket.com/web/.
Kaartjies is ook by die hekke te koop. Die toegangstariewe beloop R80 vir almal ouer as 12 jaar, en R30 vir pensioentrekkers en kinders jonger as 12 jaar. Toegang is gratis vir kinders jonger as ses jaar.