Byt vas en gee dit kans, jy gaan dalk in ’n baie kort tyd ’n pynvrye rit geniet. Bergfietsry sonder pyn
Terwyl dit baie opwindend lyk as bergfietsryers na uithoeke van die land reis om die beste roetes te vind, praat min mense oor die liggaamlike pyn wat deel van die sport is.
In al die jare wat ek al fietsry, het ek nog niemand teëgekom wat nie een of ander tyd met laerugpyn sukkel nie. Mense aanvaar later dis deel van hul daaglikse of weeklikse rit om te ly onder die tipe pyn. Daar is verskeie wanopvattings oor waarom bergfietsryers met laerugpyn sukkel. Ryers kry gereeld die verkeerde advies oor hoe hulle op die fiets behoort te sit om rugpyn hok te slaan.
Een stukkie advies wat gereeld rondgegooi word, is dat ryers regopper op die fiets moet sit, met ander woorde die saal en die handvatsels is op min of meer dieselfde hoogte sodat die rug in ’n regop posisie is.
As jy mooi daaroor nadink, maak dit nie sin nie. Hoe regopper die ryer sit, hoe meer druk is daar vanaf die bolyf en van onder af (die slae op die padoppervlak) op die werwelkolom. Om in dié posisie te ry, moet ’n bergfietsryer sterk maag- en rugspiere hê om die rugwerwels te ondersteun. Biokinetici sal jou aanraai om daardie spiere te versterk, en dis nie verkeerd nie, maar die persentasie ryers wat aanhou (of selfs net begin) met die voorgeskrewe oefeninge, is maar min.
VERANDER JOU POSISIE
Natuurlik is dit beter om jou ryery aan te vul met versterkings oefeninge, maar daar is ’n makliker manier om rugpyn sonder oefeninge te beperk. Moenie met ’n uitgestrekte bolyf op jou fiets sit nie, maar verstel jou handvatsels sodat dit laer as jou saal is. Só sit die ryer afdraande.
Dit kos tyd om gewoond te raak aan hierdie posisie, maar nou word die gewig ewerediger oor die liggaam versprei met die hulp van jou arms. In dié posisie word die druk op die werwelkolom bykans gehalveer, want die druk en slae van onder (padoppervlak) word nie regstreeks opwaarts in die werwelkolom geabsorbeer nie. Jy het ook meer beheer oor die voorwiel omdat daar nou meer druk en gewig op die wiel is.
Om die posisie tegnies reg te kry, het jy ’n langer fietsstam of wyer handvatsels nodig. Jou saal moet teen ’n afwaartse hoek gestel en die saalpen kan gelig word. Die stam moet direk en laer op die fietsraam rus, sodat die verskil in hoogte teenoor die saal groter is.
Die raad is riskant in baie geleerdes se oë, maar dit kan ryers help wat rugpyn al as deel van hul geliefde sport aanvaar het. Aanvanklik kan dit met ’n moeë nek en arms gepaardgaan, maar byt vas en gee dit kans, jy gaan dalk in ’n baie kort tyd ’n pynvrye rit geniet.
Gideon van Oudtshoorn is’ n bergfiets geesdriftige, persoonlike fiksheidsinstrukteur en vryskut-motorfiets rubriekskrywer. Hy het vanjaar weer die Absa Cape Epic voltooi. Hy is ook eienaar van GVO Bicycles, wat berg-, pad- en vetfietse invoer en versprei.