GROOT MARKVERANDERINGE

Die afgelope 15 jaar was daar groot omwentelings in die tradisionele markte waar Suid-Afrika gewoonlik vrugte verkoop het. Mnre. Pieter, Gys du Toit en me. Tanith Freeman sonder dié veranderinge uit:

■ Opberging. Volgens Tanith het Europa se opbergingstegnologie dermate verbeter dat die mark vir 12 maande van die jaar die produkte wat daar verbou word, kan voorsien. Die tegnologie het meegebring dat produkte baie langer opgeberg kan word. Die behoefte om appels in die Suidelike Halfrond te koop (tydens die noordelike markte se afseisoen), het dus afgeneem.

■ Koop plaaslik. Die appelbedryf word veral geraak deur die Britte se geneigdheid om meer Britse produkte te koop. ■ Konsolidasie. Europese supermarkte wil nie meer by ’n aantal verskillende boere koop nie, maar hulle verkies om met ’n vertikaal geïntegreerde maatskappy te werk – ’n produsent wat dus ook oor verpakkings- en bemarkingsgeriewe beskik. ■ Gesondheidsbeweging. Verbruikers is baie bewus van die gesondheidseienskappe van kos. Dis ’n gunstige neiging, maar die vrugtebedryf moet produkte aan die mark verskaf wat aan verbruikers se gesonder behoeftes voldoen, soos die rooivleis-appels, wat tekens toon van ’n hoë antioksidantinhoud. Die produkte moet ook gerieflik verpak word.

■ Verpakking. Voorheen het boere hul produkte in groot houers gelewer en dan is dit herverpak. Deesdae word dit op die plaas of pakhuis in Suid-Afrika in kleiner verpakkings gepak wat vir verbruikers geriefliker is. Dutoit het byvoorbeeld onlangs kleiner uieverpakkings bekend gestel (1 kg, 2 kg en 3 kg).