MNR. JULIAN SOUTHEY
HOE LAAT JULLE DIE FAMILIE-ONDERNEMING WERK?
In 2005 het ons ’n keerpunt bereik. Ons het vyf jaar lank die diens van die konsultasiemaatskappy Resource Consulting Services gebruik. As gesin het dit ons onder meer geleer om sake- en gesinskwessies te skei.
Dit het ons ook geleer om die drie geheime van wins te begryp: die balans tussen oorhoofse koste, bruto winsmarge per hektaar en omsetbesteding, strategiese beplanning en die opleiding van personeel. Ons het almal verskillende persoonlikhede en ’n visie vir die toekoms, maar het ’n gemeenskaplike visie vir die besigheid. Daarna was dit moontlik om moeilike gesprekke te hê.
WAT IS JUL TEELDOELWITTE?
Ons lê klem op ’n medium wolskeersel, vrugbaarheid, ooiproduktiwiteit, en lammers wat vinnig groei. Die resultaat daarvan is ’n skaap met ’n gladder lyf, wat ooreenstem met die moderne Merino.
OP WATTER OUDERDOM EN GEWIG WORD VERVANGINGSOOIE DIE EERSTE KEER GEDEK?
Hulle word op 18 maande gedek en weeg dan sowat 42 kg. Ons laat dek die vervangingsooie apart omdat die volwasse ooie geneig is om hulle te domineer, en tydens die dekproses meer aandag van die ramme kry wanneer ons hulle saam laat dek. Vervangingsooie is vir ’n korter tyd bronstig én tree minder bronstig op. Dan slaan die ramme hulle oor. Om dieselfde rede laat ons die ouer, ervare ramme die vervangingsooie dek, en die jonger ramme dek die ouer, ervare ooie.
HET JY ’N OPLEIDINGSPROGRAM VIR JOU PERSONEEL?
Ons personeel word intern opgelei in basiese veeteelt, laestres-veehantering, tattoeëring, wolklassering, die dosering en merk van lammers, windpomp-onderhoud en die instandhouding van heinings.