GEWASSE VIR KLEIGROND, BEESTE
Op ons plaas tussen Klerksdorp en Potchefstroom in Noordwes is ’n groot stuk vlei met grys kleigrond. Watter gewas kan ek in die nat kleigrond plant? Is daar enigiets wat ’n mens in vlei-kleigrond kan plant wat beeste sal vreet?
Vleigebiede moet versigtig hanteer en beskerm word omdat dié gebiede ’n gevoelige ekostelsel en biodiversiteit het.
Die grys kleigrond laat my aflei die grondsoort is moontlik Katspruit (Ortiese A op G-horison). Die grys kleur word veroorsaak deur anaërobiese toestande. Die grond is dus vir lang tye met water versadig en suurstof word uit die grond gedruk. Die term “versuipte grond” het so ontstaan. Dit is gewoonlik grond met ’n lae potensiaal omdat dit vinnig tussen uiters nat en droog wissel.
Kleigrond se katioonuitruilbare vermoë is baie hoër as dié van ander grond. Dit verwys na die hoeveelheid katione wat die grond dra. By grond met ’n hoë katioonuitruilbare vermoë is daar gewoonlik baie van al die katione. Die magnesiuminhoud is gewoonlik baie hoog in dié soort grond en die grond is geneig om toe te slaan. Dit veroorsaak die “smeereffek”. Natrium kan opbou in grond wat vir lang tye nat is. Dit verlaag die pH-vlakke en veroorsaak grondversuring.
Die gras moet dus uiters nat en droë toestande met min suurstof kan weerstaan. Suur in die grond kan die plant se wortelontwikkeling verswak en nadelig wees vir die plant se opname van voedingstowwe. Aangeplante weiding gaan waarskynlik sukkel in hierdie grond.
Vestig eerder gras wat aangepas is vir dié toestande. Oes byvoorbeeld die sade van grasse wat daar voorkom en saai dit op die grys kleigrond.