KARAAN WEERSPREEK HOMSELF
Die berig “‘Migrante is ’n bate’ (LBW, 7 April 2017) het betrekking. Met respek moet ek sê dat prof. Mohammad Karaan se logika my verstom.
Die ongetwyfeld gunstige invloed van mense wat na Amerika geïmmigreer het, soos hy dit luidens die berig beskryf het, is in werklikheid niks anders as een van die gevolge van kolonialisasie, dit wil sê kolonialisme, nie. Met sy verwysing na Amerika erken hy eintlik dat kolonialisme wel gunstige gevolge gehad het.
Dan kan die vraag met reg geopper word: Waarom verskil hy dan radikaal – met beklemtoning van die woord “inteendeel” – van premier Helen Zille van die WesKaap se geskiedkundig onweerlegbare siening dat kolonialisme nie slegs nadelige gevolge gehad het nie?
Zille kon myns insiens bygevoeg het dat, benewens byvoorbeeld die uiteindelik enorme gesondheidsvoordele vir mens en dier, kolonialisme mettertyd deur behoorlike, formele onderwys die sluimerende, indrukwekkende genetiese potensiaal van miljoene Afrikane ontsluit het. DR. RD BIGALKE