Sussex vorder sterk oor 35 jaar
Die Sussexras is welbekend aan die meeste vleisbeesboere en is reeds meer as ’n eeu in Suid-Afrika, skryf DR. CHRIS NEL.
Die Sussexras het in die afgelope paar dekades ’n omwenteling ondergaan en verskil hemelsbreed van die Sussex wat in die vroeë 1900’s in Suid-Afrika aangekom het. Die hedendaagse Sussex verskil soveel van 35 jaar gelede se beesras dat van ’n moderne Sussex gepraat kan word.
Fenotipies het telers baie aandag geskenk aan die Sussex se haarkleed en bespiering. Vandag het die Sussex ’n gladde haarkleed, en dit is goed bespierde, aangepaste diere wat hierdie mediumraamras voorwaar ’n lus vir die oog maak.
Geneties het die ras baie vordering gemaak, soos die GRAFIEK aandui. Die grafiek beeld die ras se teelwaarde-indekse uit vir sekere eienskappe, van 1980 tot 2015. In die grafiek is dit duidelik hoe die ras rakende spesifieke eienskappe verbeter of verswak het gedurende hierdie tydperk van 35 jaar.
As ons na seker die ekonomies belangrikste eienskap in vleisbeesboerdery kyk, naamlik vrugbaarheid (blou kurwe), toon die Sussex se teelwaarde-indeks 85 in 1980 teenoor ongeveer 100 vandag. Dit wil sê ’n verbetering van 15 persentasiepunte in vrugbaarheid. Daarom is dit geen verrassing nie dat die Sussex van die beste tussenkalfperiodes (TKP) het van alle vleisbeesrasse by SA Stamboek. Voorwaar ’n enorme prestasie!
As ons na die ras se melk (rooi kurwe) kyk, het Sussexkoeie se melk met ongeveer 20 persentasiepunte verbeter vanaf 1980, wat weer wys wat met doelgerigte seleksie behaal kan word. Dan kan ons ook sien dat die Sussex se kalfgroei (liggroen kurwe) met ongeveer 38 persentasiepunte verbeter het.
Die verbetering in die Sussex se melk en groei het tot gevolg dat Sussexkalwers die swaarste speen van die vyf talrykste vleisbeesrasse by SA Stamboek. Weer ’n prestasie vir ’n vleisbeesras met ’n mediumraam.
Verder sien ons die Sussex se koeiwaarde (oranje kurwe) het ongeveer 40 persentasiepunte verbeter. Die koeiwaarde (geboortegemak, kalfgroei, melk, onderhoud en vrugbaarheid) is ’n belangrike indeks. Dit wys vir ons die hedendaagse Sussex is uitstekend aangepas in Suid-Afrikaanse toestande en is een van die voorste vleisbeesrasse in die land.
Die hedendaagse Sussex-telersgenootskap is vooruitstrewend en is daartoe verbind om deur noue samewerking die ras verder te verbeter. As daar nie Sussexbulle in jou kommersiële kudde is nie, behoort jy sterk daaraan te dink. Sussexbulle is bekostigbaar en bied puik waarde vir geld. Die Sussex kan jou kudde die genetiese voorsprong gee wat jy verdien.