Wysig trustaktes só
Die Meester van die Hooggeregshof het op 6 Maart vanjaar ’n riglyn (2 van 2017) oor trusts bekend gemaak. Dit is met die doel om eenvormigheid te kry oor onder meer die aanstelling van trustees en die wysiging van trustaktes. Dié artikel is die eerste van
Verskeie aspekte is belangrik met die aanstelling van ’n trust se trustees. Die Meester van die Hooggeregshof moet gewaarmerkte afskrifte van alle nuwe trustees se ID-dokumente op lêer hou. Die Meester mag nie enige trustee afkeur of weier om ’n magtigingsbrief uit te reik nie, behalwe: As hy/sy nie sekuriteit kan verskaf terwyl dit van hom/haar vereis word nie; As hy/sy minderjarig is; en Indien die akte dit verhoed. By ’n testamentêre trust kan die Meester ’n trustee verwyder indien die trustee: Die betrokke testament ook as ’n getuie onderteken het; Geestelik siek is; Onbevoeg is om sy eie sake te hanteer; Minderjarig is. ’n Trustee kan ook verwyder word as die akte ’n persoon diskwalifiseer, byvoorbeeld dat die eggenote van ’n trustee nooit as ’n trustee aangestel mag word nie.
WYSIGING VAN TRUSTAKTES
Testamentêre trusts se inhoud mag nie gewysig word nie. Trustbegunstigdes mag bedank as begunstigdes en hul regte laat vaar.
In terme van inter vivos-trusts (familietrusts) word ’n trust as ’n kontrak beskou. Trustees mag nie nuwe begunstigdes aanwys of weglaat soos hulle goeddink nie. Begunstigdes kan te eniger tyd bedank as hulle wil. Begunstigdes mag bygevoeg word, maar moet steeds aan die akte se voorwaardes voldoen. Enige wysiging of addendum tot ’n trustakte moet aan die wetlike formaliteite voldoen. Dit behels om die trustakte op skrif te wysig en by die Meester te liasseer.
Soms bepaal die akte se wysigingsklousule dat die akte of sekere aspekte nie gewysig mag word nie. In terme van die gewoontereg kan die akte wél gewysig word soos hierbo vermeld, maar dan behoort die wysigingsklousule eers gewysig te word.
Wie mag die akte verander? Die aanvanklike partye is die oprigter en die trustees wat ingevolge die gewoontereg die akte mag wysig as hulle wilsooreenstemming het. Begunstigdes wat ’n gevestigde reg in die bates van die trust het, dit belowe is of as ’n reg aanvaar het, moet ook saam met die oprigter en trustees instem tot wysigings aan ’n trustakte, al word sulke begunstigdes nie in die wysigingsklousule vermeld nie.
Indien die begunstigde wat ’n reg op bates het, nie een van die partye is om die akte te wysig nie, is die wysiging ongeldig. Indien geen begunstigde ’n reg verkry het op bates of dit belowe is of sodanige reg aanvaar het nie, mag die oprigter en trustees die akte wysig.
Lees altyd die wysigingsklousule in enige akte om te sien wie die trustakte mag wysig en wat gewysig mag word. Indien die akte bepaal trustees mag die akte wysig en niks word oor die begunstigdes vermeld nie, mag die trustees die akte wysig sonder die begunstigdes se toestemming – al het hulle gevestigde regte in die bates van die trust, op voorwaarde dat die trustees slegs mag wysig wat die wysigingklousule bepaal.
Indien die oprigter nie meer beskikbaar is om saam met die trustees wysigings te doen nie, en voorsiening is nie gemaak dat die trustees alleenlik dit mag doen nie, moet die hof toestemming gee om die wysigingsklousule te verander en/of om die akte te wysig.
Gaan die akte deeglik na om te bepaal of ’n wysiging nie dalk in die ander klousules opgesluit lê nie. Nader die hof as daar geen wysigingsklousule in die akte is nie.
Die Meester moet seker maak die akte se voorwaardes en die korrekte prosedure word nagekom. Die wysiging moet aan al die voorwaardes voldoen. Indien die partye nie ooreen kan kom nie, moet hulle die hof nader in terme van die Wet op die Beheer oor Trustgoed (Wet 57 van 1988).
Die Meester moet ’n skrywe aan die trustees rig dat die voorgestelde wysigings ontvang en geliasseer is.
Mnr. Andrè Eloff is ’n regs-en-besigheidskonsultant van Allegiance Consulting.