KONTRAKTEURS SKEP GRÓÓT UIT BOERE SE NOOD

GELD WAT VERLIGTING aan die droogtenood van boere en diere moes bring, het skynbaar eerder in ’n verrykingskema vir diensverskaffers ontaard.

Die Regering kon steeds nie ’n presiese uiteensetting gee van die beweerde R2,5 miljard wat volgens pres. Jacob Zuma se staatsrede vir droogtehulp bewillig is nie. Die hulp wat boere ontvang het, kom glo nie naby aan dié bedrag nie.

’n Sterk vermoede van bedrog en korrupsie met die aanstelling en dienslewering deur kontrakteurs wat droogtehulp aan boere moes verleen, het Agri SA nou genoop om die Openbare Beskermer en die Ouditeur-generaal te vra om ondersoek in te stel.

WINSGELEENTHEID

Landbouweekblad het vasgestel dat die Departement van Landbou, Bosbou en Visserye nie toestemming wou verleen dat ’n koeponstelsel ingestel word as maatreël om te verseker dat die bewilligde geld doeltreffend bestee word nie.

In die Noord-Kaap is droogtehulp-voerkorrels vir vee glo met goedkoper afrondkorrels omgeruil. Altesaam 73 000 sakke afrondkorrels is afgelewer, met ’n “wins” van nagenoeg R7 miljoen wat ’n diensverskaffer daarmee kon maak.

Verder is vasgestel dat die Regering glo sowat R4 miljoen aan ’n diensverskaffer van Noordwes betaal het vir die vervoer van 800 ton ruvoer wat boere van Standerton en Ermelo aan boere in die distrikte Hantam en Namakwa geskenk het.

ONDERSOEK

Mnr. Omri van Zyl, uitvoerende direkteur van Agri SA, sê die organisasie het reeds besluit om ’n skrywe te rig aan die Openbare Beskermer én die Ouditeurgeneraal om die droogtehulp te ondersoek.

“Die landbousektor wil weet wat van die geld geword het. Die hulp het ook baie laat gekom. Die situasie is sleg gehanteer.”

Van Zyl sê daar kan nie toegelaat word dat vrae oor die besteding van die droogtehulp onbeantwoord bly nie. Pres. Jacob Zuma en die ministeriele komitee wat belas is met die droogte, het aangedui dat die R2,5 miljard vir veevoer, water, infrastruktuur, boorgate en ander ingrypings bewillig was.

“Wat het die sink van duur boorgate te doen met werklike droogtehulp aan die boere?” vra Van Zyl.

Agri SA sê hy is nie gevra om as diensverskaffer op te tree nie, hoewel hy met mnr. Senzeni Zokwana, Minister van Landbou, Bosbou en Visserye, en mnr. Mike Mlengana, direkteur-generaal van die departement, daaroor gepraat het. Die organisasie het ook ses werksessies gehad oor die droogte en die hulp wat verleen moet word waarby amptenare van die departement en ramphulpbestuur teenwoordig was. –

‘Wat het die sink van duur boorgate te doen met werklike droogtehulp aan die boere?’