Land Bank se SEB-miljarde kan kommersiële boere óók help
DIE Land Bank wil in die 2018boekjaar R1 miljard se finansiering aan swart entrepreneurs voorsien om in voorafbepaalde landboubedrywe, soos vrugte en neute, te belê.
Mnr. TP Nchocho, uitvoerende hoof, sê die bank wil ook R500 miljoen in spesifieke voedselen landbouverwerkingsondernemings belê om swart nyweraars sodoende te ondersteun.
Dié bedrae is deel van sowat R3 miljard se finansiering wat die bank in die 2018-boekjaar aan die landbou wil verskaf.
Nchocho het op ’n mediainligtingsessie gesê die bank se strategie vir ontwikkelingsfinansiering is daarop gemik om die sektor op ’n inklusiewe grondslag te laat groei.
Landbouweekblad het vroeër vanjaar berig oor R1,3 miljard wat die Wêreldbank aan die Land Bank toegeken het. Dit is een van die bank se bronne vir sy beoogde groei in finansiering.
Nchocho het gesê in die afgelope produksiejaar het die bank meer as 700 opkomende boere deur middel van samewerkingsooreenkomste met landbouvennote ondersteun.
Die groothandelfinansieringsproduk wat die bank gebruik het om dié lenings te finansier, het die afgelope jaar (tot 31 Maart vanjaar) meer as verdubbel – van R389 miljoen tot R849 miljoen.
Hy het gesê die bank het sy finansiering vir transformasie in die afgelope vyf jaar aansienlik vergroot ( GRAFIEK ).
Die bank beoog nou om ’n alliansie te sluit vir die finansiering van besproeiingsinfrastruktuur vir opkomende boere op 30 000 ha in Limpopo, KwaZulu-Natal en die Oos-Kaap.
Die bank wil volgens Nchocho opkomende boere finansieel én met tegniese ondersteuning help om kommersiële boere te word. Hy wil ook daartoe bydra dat vroue, jong mense, plaaswerkers en landelike gemeenskappe toenemend betekenisvolle deelnemers in die sektor word.
Wat laasgenoemde betref, wil die bank beleggings en projekte finansier, ’n vroegtydige program vir die bemagtiging van plaaswerkers ontwikkel en produkte ontwikkel wat landbou-ontwikkeling in kommunale en tradisionele gebiede sal ondersteun.
VOLHOUBAAR
Nchocho het gesê die bank steun grondhervormingsprojekte wat gestruktureer is en op ’n kommersieel volhoubare grondslag bedryf word.Voorbeelde van suksesvolle projekte waarby die bank betrokke is, is dié van die Sernick-groep, Mouton Sitrus en die Ambiance-tafeldruiweplaas en -pakhuis.
By eersgenoemde het die bank via die groep krediet van R25 miljoen aan 59 opkomende boere verleen wat 3 500 speenkalwers bestuur. Hulle kry ingevolge ’n drie jaar lange program steun van die groep.
Die Mouton-model behels die finansiering van ’n aandeleskema wat uiteindelik daartoe sal lei dat Masimong Holdings, ’n SEBvennoot, saam met die bank ’n belang van 35,5% in Mouton Investments sal besit.
Die Ambiance-projek steun ’n opkomende, swart boer in die ontwikkeling van ’n tafeldruifplaas van 80 ha in die Hexriviervallei en die bou van ’n pakhuis en koue-opbergingsgerief van 5 000 m2. Altesme 700 werksgeleenthede word deur laasgenoemde geskep, waarvan 140 heeltyds en 560 seisoenaal is.
SEKTORGROEI
Nchocho het gesê die bank wil gevestigde boere met finansiering en raad steun sodat hulle kapitaalbeleggings sal maak, hul boerderye sal moderniseer en hul ondernemings sal laat groei.
Die bank wil ook toenemend aandag gee aan bedrywe wat die potensiaal het vir groot groei en wil sy blootstelling aan die tuinbousektor verdubbel.
Volgens Nchocho is die bank se grootste struikelblokke die trae ekonomiese groei, die koste van kapitaal, onvoldoende sinergie met die Regering se hulpprogramme, dat sy programme nie jong mense en vroue voldoende betrek nie en kwessies rakende waterinfrastruktuur en -lisensies.