Mynbou in kwesbare gebied stopgesit
’N DRINGENDE hofaansoek deur die Federation for a Sustainable Environment (FSE) het mynbou in ’n landbou- en ekologies kwesbare gebied naby Belfast in Mpumalanga voorlopig stopgesit. Dr. Koos Pretorius, direkteur van die FSE, sê die omgewing waarin die mynbou-aktiwiteite deur die mynboumaatskappy William Patrick Bower (Edms.) Bpk bedryf word, bestaan veral uit hoëpotensiaal-landbougrond en vleilande.
“Dit is ’n gebied van net meer as 200 ha waarvan twee derdes hoofsaaklik uit hoëpotensiaal Hutton- en Clovelly-grondtipes bestaan, wat nou die gevaar loop om heeltemal vernietig te word.
“Boonop is die gebied rondom die voorgenome mynbougebied as beskermde gebied verklaar. Mynbou gaan nie net die landboubedrywe in die gebied, insluitende landbou-ekotoerisme, vernietig nie, maar ook ekologies kwesbare vleilande,” het Pretorius gesê.
SONDER TOESTEMMING
Die FSE het die hofaansoek gebring nadat William Patrick Bower begin het om onregmatig in die gebied te myn. In sy aansoek sê die FSE die mynboumaatskappy het nie toestemming van die Minister van Landbou, Bosbou en Visserye om op grond wat as landbougrond gesoneer is, te myn nie.
Die maatskappy het ook nie die nodige lisensies en sertifikate vir hersonering om ’n myn in die gebied te bedryf nie. Die maatskappy het ná afloop van dié aansoek self ophou myn.
Intussen het die Pretoriase Hooggeregshof gelas dat die Minister van Minerale Hulpbronne binne 30 dae ’n besluit moet neem rakende ’n appèl teen die maatskappy se mynreg in die gebied. BirdlifeSA, asook die Escarpment Protection Group (EEPOG), het appèl aangeteken teen hierdie mynregte, wat reeds in 2013 deur die Departement van Minerale Hulpbronne toegeken is.
Sedertdien het nóg mnr. Mosebenzi Zwane, die huidige Minister van Minerale Hulpbronne, nóg sy voorganger, mnr. Ngoako Ramatlhodi, ’n beslissing oor dié appèlle gelewer.
Die Hooggeregshof het Zwane egter nou gelas om ’n finale besluit daaroor te neem.
STILBLY BETEKEN ‘NEE’
“Sou die Minister nie binne die voorgeskrewe dertig dae sy besluit neem nie, het die hof gelas dat die appèl dan as geweier beskou sal word. Dit sal BirdlifeSA en EEPOG toelaat om voort te gaan met die geregtelike hersiening om die opheffing van die mynreg uit te voer. Sou die appèl egter gehandhaaf word, verloor die mynmaatskappy sy mynreg en kan mynbou in die gebied nie voortgaan nie,” het Pretorius gesê.
‘Mynbou gaan nie net die landboubedrywe in die gebied, insluitende landbou-ekotoerisme, vernietig nie, maar ook ekologies kwesbare vleilande.’