GESLOER MET FICA-WET KAN BUITELANDSE BELEGGERS LAAT WYK

PRES. Jacob Zuma se gesloer met die ondertekening van die wysigingswetsontwerp op die Finansiële Intelligensiesentrum (FIC) kan rampspoedige gevolge vir Suid-Afrika inhou.

Mnr. Daniël Kriel uitvoerende hoof van Sanlam Private Wealth, sê dit kan tot ’n uitvloei van kapitaal lei.

Volgens hom is buitelandse én plaaslike beleggers huiwerig om te belê as ’n land nie geskikte en internasionaal aanvaarde prosedures teen geldwassery het nie, die bron van rykdom nie bekend is nie en mense geld op ongeoorloofde maniere kan bekom.

Vir Suid-Afrika om internasionaal mededingend te wees, moet hy aan internasionale standaarde oor finansiële markte en regulasies teen geldwassery voldoen.

Kriel sê deursigtigheid en die openbaarmaking van inligting word wêreldwyd ál meer vereis. Dit is deel van pogings om geldwassery en terreur te bekamp, wat as ’n goeie ding gesien behoort te word.

Suid-Afrika se Nasionale Vergadering het die FIC-wetsontwerp, wat Suid-Afrika se Wet op die Finansiële Intelligensiesentrum (Fica) in ooreenstemming met internasionale standaarde vir beste praktyk sal bring, reeds einde Februarie goedgekeur, maar Zuma het dit teen druktyd nog nie bekragtig nie.

SWARTLYS

op ’n swartlys plaas. “Buitelanders kan dan besluit om hul beleggings in aandele op die JSE te onttrek, wat ’n beduidende nadelige uitwerking op die beleggingsgemeenskap sal hê deur regstreekse én onregstreekse beleggings in aandeleportefeuljes.”

Suid-Afrika het onlangs twee nuwe gelisensieerde beurse gekry–ZARXen4AX– enKriel sê hul kans op sukses sal in so ’n situasie baie kleiner wees.

GROTER SOEKLIG

Volgens hom gaan die wetswysiging daaroor dat ’n risikogegronde benadering gevolg moet word waarvolgens kliënte van aanspreeklike instellings (soos banke, welvaartbestuurders, lewensversekeraars en in ’n sekere mate die praktyke van finansiële adviseurs) se risiko beoordeel word. Vir kliënte met ’n hoër risiko moet baie strenger omsigtigheidsondersoeke gedoen word. “Dit beteken kliënte sal nie net een keer ingevolge Fica geverifieer word nie, maar finansiële instellings sal hul geldsake deurlopend aan omsigtigheidsondersoeke kan onderwerp.

“Die strenger ondersoeke sal nie net vir polities blootgestelde mense geld nie.

“Die wysigingswetsontwerp raak buitelandse én plaaslike vooraanstaande en invloedryke mense, en geld vir mense in die private sektor, asook vir mense wat sake met die staat doen.

“Die proses sal waarskynlik taamlik lastig wees. Kliënte sal nie net aan finansiële instellings moet openbaar wat die bron van hul inkomste en welvaart is nie, maar ook bewyse moet lewer,” sê Kriel.