POLITICI IN BEKGEVEG OOR PLAASMOORDE

Plaasmoorde is in Maart vir die eerste keer tydens ’n vurige debat in die Parlement bespreek.

Die debat is ter tafel gelê deur die Vryheidsfront Plus en weerspieël die groter verdeling wat oor die onderwerp van plaasmoorde en ook binne die breër Suid-Afrikaanse samelewing heers.

Terwyl die DA, ANC en Vryheidsfront Plus grootliks saamstem oor die erns van die probleem van landelike veiligheid, het die EFF en Agang herhaaldelik verwys na gevalle van arbeidsmisbruike op plase, onder meer die Deense dokumentêr waarin beweerde oortredings van die arbeidswet by die Robertson- en Leeuwenkuil-kelder begaan is.

Beledigings is heen en weer geslinger en verskeie afbrekende aanmerkings oor boere kon uit die banke van die Nasionale Vergadering gehoor word. Mnr. Mosiuoa Lekota (foto), leier van Cope, het in die debat uitgevaar teen politici wat mense opsweep en ’n vrugbare klimaat vir misdaad en geweld skep.

“As ons gebeure in landelike gebiede gaan stopsit, moet ons hier in die Nasionale Vergadering begin. As ons die wet verontagsaam en uitsprake maak wat mense mislei en aanmoedig om mekaar aan te val, is ons deel van die probleem.”

Hy het uitgevaar teenoor pres. Jacob Zuma se uitsprake oor grondhervorming en hom beskuldig daarvan dat hy nie politieke ruggraat het nie. “As ons president uitsprake maak wat teenstrydig is met die Grondwet, is hy deel van die misleiding van jong mense. Ons kan nie daaroor stilbly nie.”

Voorts het hy gesê politici durf nie stilbly as die EFF se mnr. Julius Malema dele van die bevolking dreig met die dag wanneer hy in ’n magsposisie is nie.