Ná ’n opwindende ontwikkelingsproses en goeie verkope sedert die Monosem QUAD-MAX beskikbaar is, het dié veelsydige planter ’n blink toekoms.
Met die QUAD-MAX het Monotec ’n raamkonstruksie bekend gestel wat in konfigurasies van tot 18 m beskikbaar is, maar ook vir nouer rywydtes van onder 56 cm geskik sal wees.
In nouer rywydtes kan die QUAD-MAX werk sonder dat die drawiele ’n beperking is deurdat hulle voor en agter die karretjies gemonteer is.
Wye konfigurasies sal bestaan uit drie individuele planterseksies wat permanent aanmekaar verbind bly. Hulle word vir padvervoer nooit op- of vorentoe gevou nie, maar word lengtegewys met ’n aparte disselboom, wat aan die sykant sit, van land tot land gesleep.
Die QUAD-MAX het enorm groot kunsmisbakke waar die uitdraaiers ook by die wye konfigurasies bo elke ry gemonteer is. In vergelyking met ’n sentrale lugdrukverspreidingstelsel sal boere dieselfde kort staantyd vir volmaak hê sonder bekommernisse oor horisontale kunsmispype wat verstop raak, of wisseling in lugdruk wat verspreiding beïnvloed.
ALMAL WIL DIT HÊ
Ná goeie verkope in net een seisoen het ’n groot aantal navrae gewys dat die QUAD-MAX se raamkonstruksie veel wyer in aanvraag is as die mark waarop dit aanvanklik toegespits was.
Derhalwe is die QUAD-MAX van vanjaar as ’n A- en ’n Bmodel beskikbaar.
DIE A-MODEL
Vir boere wat soja of mielies in nou rywydtes van 56 cm of nouer plant, is die A-model geskik. Hierdie model is beskikbaar as ’n geenbewerkingwerktuig van tot 15 m wyd.
Dit het groot, gekombineerde kunsmis- en-saadbakke wat tussen volumeverhoudings kan omskakel en boere baie volmaaktyd sal bespaar.
DIE B-MODEL
Boere wat rye van 76 cm, 91 cm en selfs wyer plant, kan nou die B-model bestel met ’n wydte van tot 24 rye.
Soos die A-model vou dit nie op- of vorentoe om vervoer te word nie.
Die QUAD-MAX B sal goed werk vir die boer wat konvensioneel mielies plant en in bewerkte lande of los grond sou sukkel met ’n swaar opvouraamkonstruksie wat wegsak.
By die B-model sit elke saadbak afsonderlik op elke karretjie en die kunsmisbakke is groot, maar net vir kunsmis. Dié model is ook met ’n vloeibare kunsmisstelsel beskikbaar.
Albei alternatiewe is tans by Monotec beskikbaar met verskeie opsies, soos ryskoonmakers, druk- en toetrapwielvariasies, gifspuittoestelle en die hidroulies of elektries veranderlike toediening van kunsmis en saad.
NAMPO
Monotec stal vanjaar die QUAD-MAX op die NampoOesdag uit en sien uit daarna om te hoor van boere se ervarings, probleme en oplossings om te verseker dat Monosemplanters aan die voorpunt van vernuwing bly. co.za; info@monotec. 021 865 2048. Bylae tot Landbouweekblad