Volhoubaarheid vorm die grondslag van Omnia se benadering. Langlewendheid en sukses is in Omnia én boere se belang.
Omnia bestee jaarliks miljoene rande aan navorsing en ontwikkeling om bestaande boerderypraktyke te verbeter en om water en voedingstowwe doeltreffend aan te wend. Ons wil boere help om met minder insette doeltreffender en volhoubaarder te boer.
Grondgesondheid is ’n belangrike deel van volhoubare boerdery. Dit behels die integrasie en optimalisering van die voedings-, fisiese en biologiese aspekte van grond wat belangrik is vir volhoubare produktiwiteit, groter opbrengste en die omgewing.
Gevolglik is die splinternuwe grondgesondheidsprisma ontwikkel. Dié hulpmiddel bied ’n holistiese ontleding van die voedings-, fisiese en biologiese aspekte van jou grond se gesondheid en skakel dit om in ’n eenvoudige, visuele voorstelling. Die grondgesondheidsprisma lig die beperkende faktore uit wat reggestel moet word om opbrengs en gehalte te verbeter.
’n Streng wetenskaplike proses word gevolg. Die grond se chemiese status word ontleed deur laboratoriums wat by die nasionale akkreditasiestelsel goedgekeur is om die voedingsvlakke van die grond te bepaal. Opgeleide landboukundiges gebruik die ontledings om ingeligte voedingsvoorstelle te maak om voedingsvlakke volgens die behoeftes van die spesifieke gewas te optimaliseer.
Fisiese grondgesondheid word gemeet deur onder meer die grondtekstuur, waterafloop en verdigtingslae te ontleed. Wetenskaplikes kan op grond daarvan dan ’n oplossing vir enige beperkende faktore bied.
GRONDLEWE
Die rol van grondorganismes in grondvrugbaarheid lewer ’n bydrae tot: Die saamkleef van gronddeeltjies wat die grondstruktuur verbeter; Die voedingsiklus; Die mineralisering van voedingstowwe na ’n plantbeskikbare vorm; Die vervoer van voedingstowwe vanuit die grond tot by die plantwortels; Die afbreek van gifstowwe in die grond en die vermindering van plantsiektes deur as biobeheeragente op te tree. Die metaboliese proses in plante word bemiddel deur ensieme wat deur mikro-organismes geproduseer word.
Grond is ook die tuiste van vrylewende en plantparasitiese aalwurms of nematodes wat grondorganismebevolkings reguleer en tot grondvrugbaarheid bydra.
Plantparasitiese aalwurms is ’n groot beperking op volhoubare gewasproduksie, maar kan bestuur word wanneer die rol van elke soort in ’n OmniBio™-ontleding gespesifiseer word. Die hoeveelheid en soorte aalwurms in die grond weerspieël gevolglik die hoeveelheid voedsel wat beskikbaar is. Dit is ’n aanduiding van die mikrobiese diversiteit van die grond.
NAMPO
Die grondgesondheidsprisma word op Nampo bekend gestel.
Boere sal die ryk ekostelsel van mikroskopiese wesentjies kan sien wat hul biologiese grondgesondheid beïnvloed deur ’n virtuele werklikheidstoer van die grondomgewing te onderneem.
Die ander aspekte van die grondgesondheidsprisma sal deur video’s verduidelik word: Die voedingsaspek en die fisiese aspek. ’n Driedimensionele holografiese beeld sal al die aspekte bymekaarbring om te wys hoe die grondgesondheidsprisma in die praktyk werk.
Boere sal die geleentheid kry om met die hulp van die beskikbare oplossings die grondgesondheid op hul plaas te verbeter, te besigtig en te bespreek. Grondwetenskaplikes, bioloë en landboukundiges sal by Nampo vrae beantwoord.
LABORATORIUM
Die nuwe OmniBio™laboratorium spog met die nuutste tegnologie en bied aan boere gesofistikeerde, eksklusiewe, wetenskaplike en veld-geverifieerde mikrobiese waardebepalingsoplossings.
OmniBio™ lê klem op die biologiese aanwysers wat die funksionele rol en biodiversiteit van grondmikro-organismes bepaal. Die kundige interpretasie van ontledings en omvattende veldnavorsing bied ’n pasgemaakte, volhoubare grondgesondheidsmodel.
Gesonde, produktiewe grond is veerkragtig. Dit lewer groeikragtige plante deur vog en voedingstowwe optimaal te gebruik sodat plante minder vatbaar is vir siektes. fertilizer.co.za; omnia.co.za; www. fertilizer@ 011 709 8888. Bylae tot Landbouweekblad