DIÉ WEEK IN DIE LANDBOU
LEWENSVERLIES
Drie Vrystaatse plaasbewoners is op 20 April in twee aparte voorvalle in die grensgebied met Lesotho vermoor – die eerste plaasmoorde vanjaar in dié provinsie. Die verdagtes is nog op vrye voet. Mnr. Henk Vermeulen, uitvoerende hoof van Vrystaat Landbou, benadruk dat boere, hul gesinne en werkers moet inskakel by plaaslike veiligheidstelsels en gereelde kontak met hul bure behou. Hy doen ook ’n beroep op plaasbewoners om paraat te wees en te let op verdagte mense in hul omgewing sodat hulle hul bure, plaaswagte en veiligheidsgroepe in kennis kan stel. Lees meer op bl. 22.
SKANSGELDE
Die Agri Securitas-trustfonds het onlangs kamerastelsels vir die Hartbeesfontein-landbouvereniging in Noordwes en die Buffelshoek-landbouvereniging in die Oos-Kaap geborg wat vir monitering, die insamel van inligting en as afskrikmiddels gebruik sal word. Die fonds het ook geld beskikbaar gestel vir Frankfort Landbou en die Marquard Distrikslandbou-unie in die Vrystaat vir die koop van veiligheidstoerusting en die oprig van radioversterkers wat die plaaswag binne die Landelike Beveiligingstrategie sal gebruik. Vrystaat Landbou se Veiligheidslessenaar het geld ontvang vir ’n databasis wat sal help bepaal of voornemende werksoekers ’n misdaadrekord het.
NUWE SKOU, OU SKOU
Landbou kraai koning op die nuwe Mpumalanga-buiteleweskou wat van 31 Augustus tot 3 September vir die eerste keer by die Mbombela-stadion in Nelspruit gehou word. Volgens mnr. Werner Martin, die projekbestuurder, sal daar naas vee- en landbouwerktuiguitstallings ook klem gelê word op landboubedrywighede wat eie aan die provinsie is, asook slypskole vir opkomende boere oor finansiering en plaasbestuur. Intussen verwag organiseerders van die 167ste Royal-skou, van 26 Mei tot 4 Junie in Pietermaritzburg, strawwe mededinging. Mnr. Jonathan Tyler van die skou se veekomitee sê minder diere is ingeskryf omdat veeboere se kontantvloei beperk is, maar hulle verwag boere sal slegs die beste van die goeie diere skou toe bring.
EL NIÑO STEEK VAS
Klimaatmodelle voorspel steeds dat ’n El Niño-weerpatroon in die tweede helfte van die jaar kan ontwikkel. Dié weerpatroon word gewoonlik verbind met laer reënval oor Suider-Afrika. Die Amerikaanse nasionale oseaniese en atmosferiewe administrasie se mees onlangse klimaatsverslag verwag dat normale toestande oor die Stille Oseaan sal heers tot Junie, waarna daar ’n kans van om en by 50% is dat El Niño-toestande van Augustus tot Desember sal heers.
HEKTARE REK
Die Oesskattingskomitee voorspel die hoogste mielie-opbrengs per hektaar tot nog toe – 5,53 ton per hektaar. Volgens die derde oesskatting, wat op 25 April bekend gemaak is, is die oppervlakte onder mielies 2,629 miljoen hektaar, en word ’n kommersiële oes van 14,536 miljoen ton verwag. Dit is selfs groter as die vorige skatting. Die komitee verwag 82% van dié oes sal uit die Vrystaat, Mpumalanga en Noordwes kom. Dié oes hou rampspoedige gevolge vir boere se winsgewendheid in. Lees meer op bl. 14/15.
UITVOER-SLAG
Oos-Kaapse sitruskwekers vrees dat die streek ’n daling van tot 50% in die opbrengs van uitvoergehalte nawels (Klas 1 en 2) kan hê weens gesplete skille en bome wat hul vrugte afgooi. Fresh Plaza berig Suid-Afrika kan vanjaar tot 5 miljoen minder 15 kg-kartonhouers uitvoer as die aanvanklike skatting van 26,3 miljoen kartonhouers. Weens versadigde markte wêreldwyd sukkel appel-uitvoerders ook om hul produkte van die hand te sit en die swak ekonomie kelder die mark in Afrika. Teen die 15de week van die uitvoerseisoen is daar vanjaar 10% minder Golden Delicious-appels uitgevoer as verlede jaar, maar Nigerië, wat ’n derde van die Suid-Afrika se Golden-opbrengs koop, het 32% minder ingevoer.