MINISTER SOEK SAAM NA NUWE MIELIE-MARKTE
INDONESIË is ’n nuwe moontlike uitvoermark vir mielies waarna verkopers kyk in die lig van ’n geraamde 2,7 miljoen ton mielies wat in die nuwe bemarkingsjaar, wat op 1 Mei begin het, uitgevoer sal moet word.
Mnr. Jannie de Villiers, uitvoerende hoofbestuurder van Graan SA, sê Suid-Afrika se groot markte in die verlede was Japan, Suid-Korea en Taiwan – as daar surplusse was.
“Ons sal weer poog om daar in te kom en ek glo sodra die prys reg is, sal die uitvloei begin. Ek weet van sowat drie skeepsvragte wat al verkoop is. Mielieboere se heil lê in die ontwikkeling van nuwe markte, byvoorbeeld vir hoender in Suid-Afrika en uitvoer na die Ooste.”
Hy sê oor die moontlikheid van uitvoer na die Midde-Ooste lyk dit of wetgewing van en permitte vir geneties gemodifiseerde (GM) mielies nog ’n probleem is om van die markte daar oop te kry. Volgens hom is mnr. Senzeni Zokwana, Minister van Landbou, Bosbou en Visserye, ook geesdriftig besig om te help soek na nuwe markte.
SKULD
Oor die feit dat boere se skuldposisie hulle sal verhinder om mielies terug te hou totdat die pryse verbeter, het hy gesê ná die droogte kan dit wel ’n probleem wees, maar daar is ook goeie tekens. “Op Graan SA se kongres is die afgevaardigdes gevra oor hul skuldposisie. Heelwat minder afgevaardigdes het aangedui dat hulle skuld moes herskeduleer as wat ons aanvanklik verwag het.”
Daar is ook ’n baie goeie sojaboonoes op die lande. “Die opbrengs lyk baie goed en die prys is ook nie te sleg nie. Dié boere wat mielies én sojabone geplant het, kan dalk goed vaar met hul sojabone.”
Met die oes in volle gang, lyk dit of opbrengste hoër is as die nasionale gemiddelde van 1,6 ton/ha. Mnr. Wandile Sihlobo, ekonoom by die landbousakekamer Agbiz, meen dit ondersteun die Oesskattingskomitee se siening van ’n rekord-sojaboonoes.
Hy sê wat mielies betref, is opbrengste sover ook bogemiddeld en die naasgrootste oes in die geskiedenis word verwag. “Droë toestande geld in die mielieproduksiegebiede, wat ook goed is vir die oesproses.”
Sihlobo sê in die seisoen 2016’17 wat op 30 April geëindig het, het Suid-Afrika ’n geraamde 2,26 miljoen ton mielies ingevoer. In teenstelling daarmee sal na verwagting 2,7 miljoen ton in die nuwe bemarkingsjaar uitgevoer moet word, waarvan omtrent 52% wit en 48% geel sal wees.
–
‘Ons heil lê in die ontwikkeling van nuwe markte.’