DIE ANDER SÊ
DIE Mededingingskommissie het onlangs ’n aantal markondersoeke van stapel gestuur wat probeer vasstel wat (indien enigiets) mededinging verhinder en wat daaromtrent gedoen kan word.
Dit kom na wetswysigings dit moontlik gemaak het vir die kommissie om sy eie ondersoeke te inisieer pleks van om klagtes op te volg.
Onder dié ondersoeke was een oor die mark vir vloeibare petroleumgas, private gesondheidsorg en die kleinhandel-kruideniersmark, wat geskoei is op ’n ondersoek na bankkoste in 2008.
Dit is ’n taamlik lukrake lys sektore en dis onduidelik in watter mate enigeen van dié markte hierdeur meer mededingend gemaak is, of gemaak sal word.
Die proses self is miskien die belangrikste deel van die ondersoek omdat voorleggings en openbare verhore die werking van dié bedrywe blootstel aan openbare ondersoek. Dit kom egter teen ’n groot koste vir die kommissie én eindelik die belastingbetaler, sowel as die groot maatskappye wat ondersoek word en wat baie tyd en geld afstaan om inligting te verskaf en opdragte aan prokureurs te gee.
Geen vervolgings het voortgespruit uit die bank- of petroleumgas-ondersoeke nie. Uit die bank-ondersoek het daar ’n paar kliëntevriendelike veranderinge aan OTM-tariewe gekom. Of dit al die tyd en moeite werd was, is ’n ope vraag.