HOEKOM KIES REKENAAR WENNER?

Tydens die afgelope Bloemskou in Bloemfontein het ek en my gesin die Elite-bulkampioenskap aanskou. Die tent was netjies en professioneel en die bulle van hoogstaande gehalte – die room van elke ras.

Daar is 17 bulle vertoon, waaruit die beoordelaars die kampioen moes aanwys. Hulle het toe ses bulle gekeur. Uit dié ses moes die kampioen aangewys word, gegrond op voorkoms en groeisyfers wat deur SA Stamboek per rekenaar bygehou word.

Groot was my en die beoordelaars se verbasing toe ’n bul wat nie gekeur was nie, deur die rekenaar aangewys is as die Elite-kampioen.

Nou vra ek: Hoekom was daar hoogs opgeleide beesraskenners vir die keuring van die bulle? Hoekom die beoordelaars so verneder? Hoekom die boere al die koste laat aangaan om hul pragdiere op die skou te vertoon as ’n blikbrein besluit watter bul is die Elite-kampioen?

Die wyse waarop die kampioen aangewys is, is absurd en ’n klap in die gesig van elke stoetboer en beoordelaar wat by die kampioenskapsbyeenkoms

betrokke was. SA Stamboek kon net sowel aan die “kampioen” se eienaar ’n teksboodskap gestuur het. Dan was al die ongerief en koste om die diere by die skou te kry, nie nodig nie.

Ek sal nie verbaas wees as daardie stoetboere nie die volgende Elite-kampioenskap ondersteun nie L.L. SMIT Kimberley