DODELIKE UITBREKING TREF VEEBOERE
TALLE besoekers het op die Nampo-Oesdag by Landbouweekblad se stalletjie raad by dr. Faffa Malan gevra oor erge lamen kalwervrektes.
Een boer het ontsteld vertel hoe hy 1 000 lammers verloor het. Die ergste uitbrekings van bakteriese siektes is in die OosVrystaat aangemeld, maar dit is ook besig om te versprei.
Ondersoeke op dooie lammers het gewys sekere Escherichia coli-stamme is vir die vrektes verantwoordelik. In talle gevalle was kriptosporidiose ook teenwoordig. ’n Span wetenskaplikes probeer tans om alle moontlike middels te vind om die uitbrekings hok te slaan.
Hulle beveel aan dat boere hul ooie voor lamtyd met ’n outogene entstof inent.
Sulke entstowwe word vervaardig van die bakterieë wat geïsoleer word van monsters wat veeartse van aangetaste diere neem.
Dok Faffa noem dat daar wel middels beskikbaar is by veeartse wat kan help om die skade te voorkom en te beperk, maar sê ook dis belangrik om vas te stel watter spesifieke antibiotika doeltreffend is teen die bakterieë, deur ’n antibiogram te laat doen.
HIGIËNE
Dok Faffa sê dit is tans moeilik om vas te stel waarom die siektes uitbreek en versprei, maar maan boere om groot klem te lê op higiëne en biosekerheid. Ander bydraende faktore sluit in die uitwerking van die droogte wat tot proteïentekorte lei, asook swak kolostrum of kolostrum wat nie ingeneem word nie, of wat nie teenliggame teen die spesifieke E. coli-stamme bevat nie.
Ander faktore sluit in vitamien A-tekorte, voer van hoendermis, besmette water, stof, draerdiere of intensiewe stelsels waar die stamme vastrapplek kan kry.
Alle ander oorsake van diarree moet ook ondersoek word. Enige siek diere moet onmiddellik uit die kudde verwyder, in kwarantyn geplaas word en elektroliete in hul drinkwater kry.
Dok Faffa raai boere ook aan om artikels op Landbou.com na te slaan oor E. coli en kriptosporidiose in diere.
Begin soek by http://www. landbou.com/nuus/duisendlammers-vrek-oor-e-coli , of kontak Dok Faffa per e-pos by dokfaffa@nashuaisp.co.za. — CHRIS BURGESS
‘Dit is belangrik om vas te stel watter spesifieke antibiotika doeltreffend is teen die bakterieë deur ’n antibiogram te laat doen.’