Franse neem die leisels oor by Profert
’N Franse kunsmismaatskappy het na vore getree om tot die redding van die beleërde Profert te kom.
Profert was in ’n stadium Suid-Afrika se derde grootste kunsmismaatskappy, en sy ondergang word nou al die afgelope twee jaar wyd voorspel.
Die Land Bank, wat saam met ’n Chinese maatskappy een van twee aandeelhouers in Profert is, moes verlede jaar na bewering noodgedwonge minstens
R1,2 miljard bestee om die maatskappy aan die gang te hou.
Sedertdien is hard en wyd na ’n koper gesoek om die Profert-boot weer te help vaar.
Die Franse maatskappy Roullier het toe kort voor druktyd aangekondig dat hy beoog om Profert oor te neem. ’n Reeks transaksies moet nog gefinaliseer word, en die Mededingingskommissie moet ook nog die jawoord gee, lui ’n verklaring.
Roullier doen in 50 lande sake,
het ’n omset van meer as 3 miljard euro, en wil deur Profert ’n basis in Afrika bewerkstellig. Die maatskappy spesialiseer veral in vloeibarekunsmisprodukte en het 7 300 werknemers.
Die Roullier-groep is in 1959 op die dokke van Saint-Malo op die noordwes-kus van Frankryk gestig nadat ’n boorling, mnr. Daniel Roullier, ’n neerlegging van kalksteen en alge gekoop het, en ’n grond-opknapper daaruit onttrek het. –