SA wyne steeds na Noorweë

DIE Noorweegse wynmonopolie Vinmonopolet het aangekondig dat wyninvoer uit Suid-Afrika nie “in dié stadium” gestaak gaan word nie.

Dit volg ná ’n ouditeur en tolk namens Vinmonopolet van 13 Maart tot 8 April altesame 22 plase in Stellenbosch, Paarl en Robertson besoek het om die aantygings te ondersoek wat in die Deense dokumentêr Bitter Grapes – slavery in the vineyards gemaak word.

Dié dokumentêr het internasionaal opslae gemaak nadat dit werktoestande in die plaaslike bedryf aan die lig gebring het. Dit is onder meer in Swede, Denemarke en Noorweë uitgesaai.

“Baie verbruikers het ons met groot besorgdheid gekontak nadat die Bitter Grapes-dokumentêr op 1 November in Noorweë uitgesaai is. Sommige mense sou duidelik nie weer Suid-Afrikaanse wyn koop nie, maar hulle was ver in die minderheid,” het mnr. Kristian Hogstad, korporatiewe hoof van Vinmonopolet, aan Landbouweekblad gesê.

“Die meeste Noorweërs reken steeds Suid-Afrikaanse wyne bied goeie gehalte.”

Vinmonopolet is ’n kleinhandelaar in alkoholiese drankies en behoort aan die Noorweegse regering. Dit is die enigste maatskappy wat drank met ’n alkoholinhoud van meer as 4,75% in Noorweë mag verkoop. Suid-Afrika is vir hom ’n klein mark.

ONAFHANKLIKE OUDITS

Volgens Hogstad het die ouditeur agt spesifieke onderwerpe tydens sy besoeke ondersoek. Produsente is daarna ingelig oor die bevindinge en op grond daarvan is hulle kans gegee om verbeteringe aan te bring.

“Ons sal net ophou om wyn (uit Suid-Afrika) in te voer as die produsente of plase nie die regstellings aanbring nie.

“Ons verwag van hulle om met die samewerking van Noorweegse invoerders hierdie aanpassings te maak.”

Hogstad sê hulle het verskeie risiko’s bespeur.

“Ons span se grootste struikelblok was naspeurbaarheid en om inligting te kry oor die produsente se verskaffing sketting.”

Hogstad het erken Suid-Afrika is nie die enigste land met dié tipe uitdagings nie. Hulle is tans onder meer besig om soortgelyke probleme in Sentraal-Amerika se rumbedryf uit te stryk.

“Daar is talle lande wat hoog op ons lys van risiko-ontledings verskyn. Nie een van daardie lande kry egter dieselfde media-aandag as Suid-Afrika nie.”

‘Sommige mense sou duidelik nie weer Suid-Afrikaanse wyn koop nie, maar hulle was ver in die minderheid.’