Diervet dalk nie só sleg, toon navorsing
Die waarheid van die algemene siening dat plantvet “gesonde vet” is, terwyl dié van diere sleg is, is nie so seker as wat baie mense dink nie. Die onverwerkte bevindings van ’n navorsingstudie van byna 50 jaar gelede het onlangs in die mediese joernaal BMJ verskyn. Daarin skryf dr. Lenner Veerman, senior navorser aan die Universiteit van Queensland in Australië, dat alles wat mense oor die poli-onversadigde vet in groente en die versadigde vet in diere glo, kan in der waarheid ’n leuen wees.
Die voorheen onbekende bevindings kom van die grootste studie in sy soort. Dit is van 1968 tot 1972 in Minnesota, Amerika, gedoen en 9 423 mense het daaraan deelgeneem. Dit is onderneem om die opvatting te toets dat die poli-onversadigde vette in groenteprodukte op lang termyn gesonder is as die versadigde vette in vleis, room en botter.
Net ’n enkele verslag oor die navorsingsprojek is in 1989 uitgereik. Daardie verslag het die vraag probeer beantwoord of groentevette die risiko van hartsiektes kan verlaag. Die verslag het nooit aangedui of diervette eintlik gesonder vir die hart kan wees as polionve rsadigde vette nie.
Veerman, wat sedertdien oorlede is, was grootliks vir die navorsing verantwoordelik. Sy kinders het onlangs van die onverwerkte inligting in ’n kelder gevind. Daarin het die navorser bevind dat die deelnemers tussen die ouderdom van 20 en 97 jaar se cholesterolvlakke met gemiddeld 14% verlaag het nadat hulle plantvette met diervette vervang het.
Die navorsingstudie was nie sonder foute nie. Dit het onder meer nie aandag gegee aan die verskillende siektes of kankers wat veroorsaak kan word as sekere soorte vet ingeneem word nie.
Dit bly egter een van die grootste navorsingsprojekte tot dusver en weerspreek die opvatting dat plantvet minder geneig sal wees om are te verstop en hartaanvalle te veroorsaak as die versadigde vette wat in diere voorkom.