VOLHOUBARE KATOEN BRING HOOP VIR BEDRYF
As Suid-Afrika se katoenbedryf volhoubaarder word en nuwe plukkers word aangekoop, kan plaaslike produksie geleidelik katoenlint-invoer vervang.
Die produksie van katoen in SuidAfrika kan vanjaar styg van 50 457 bale (van 200 kg elk) tot 73 359 bale (sien TABEL ). Suid-Afrika verwerk jaarliks byna 23 000 ton katoen. Weens die droogte het die eindvoorraad katoenlint by wewers met 30% tot 2 823 ton gedaal.
Plaaslike katoenpryse het op ’n jaargrondslag met 14% gestyg. Ten spyte van die belowende herstel in produksie, moet Suid-Afrika steeds katoen invoer om in die plaaslike vraag te voorsien.
Die produksie en verbruik van Suid-Afrikaanse katoenvesel het in die laat 1980’s ’n hoogtepunt bereik toe Suid-Afrika jaarliks nagenoeg 75 000 ton katoen vir binnelandse verbruik gelewer het. Katoenproduksie het ná die bloeitydperk van 63 000 ton tot die huidige 25 650 ton gedaal.
Belanghebbendes in die katoen waardeketting probeer om produksie te verhoog. Ondanks die droogte is die eerste tekens van sukses tydens hul inisiatief se derde jaar steeds belowend.
Belanghebbendes in die ketting steun die inisiatief om die produksie en verbruik van Suid-Afrikaanse katoen te verhoog. Hulle steun ook die toename in plaaslike katoenproduksie om die volgende redes.
Dit help met werkskepping en om S EB-katoen verskaffers aan belanghebbendes in die totale waardeketting te help ontwikkel om aan toekomstige beleidsvereistes (SEB-telkaart) te voldoen.
Die doeltreffende bestuur van die waardeketting word be- werkstellig, asook die deurgee en bepaling van marges van die kleinhandel tot die produsent. Toewyding is ’n vereiste om deel te bly van die waardeketting, ongeag markver anderinge.
’n Voldoende nuwe vermoë om katoen te spin moet gevestig word. Die bestaande vermoë is ontoereikend om in die potensiële plaaslike vraag te voorsien en invoer te verplaas.
Nuwe katoen plukkers tegnologie moet uitgebrei word, hoewel nuwe plukkers duur is. Die nuwe plukkers kan die eenheidskoste en produktiwiteit van katoenverbouing doeltreffend verlaag as die plukkers se volle vermoë benut sou kon word.
Internasionale neigings noop die katoen waardeketting om meer volhoubaar oor waterverbruik en maatskaplike aanspreeklikheid te wees. Verbruikers wil weet wat die oorsprong is van die katoen wat gebruik is om hul katoenprodukte te maak.
Die plaaslike katoenbedryf wil minder afhanklik wees van katoen uit Indië en China. Die bestelling van kledingstukke uit China kan tot 18 maande duur voor dit in Suid-Afrika kom. Teen dié tyd het verbruikers deur sosiale netwerke al bewus geword van nuwe modeneigings en daal die vraag na bestelde produkte nog voor dit hier is. Die reaksietyd op nuwe modeneigings moet korter word. Dit geld ook vir spinners wat tot 107 dae moet wag voor bestelde, ingevoerde katoenlint aanland.
Die finansiering van duur plukkers is ’n probleem as sekerheid oor toekomstige pryse en die vraag na katoen nie deur kontrakte op mediumtermyn geformaliseer kan word nie.
’n Wesenlike risiko bestaan dat belanghebbendes hulle aan die waardeketting kan onttrek as marktoestande verander. Dit kan produsente wat duur toerusting gekoop het en verpligtinge moet nakom, in die pekel laat beland. Elke belanghebbende in die waardeketting moet verbind wees tot produkte van wêreldgehalte, met ’n lang verbintenis tot die waardeketting. Waardekettings kan begin meeding en toewyding is belangrik vir stabiliteit.
STRUIKELBLOKKE
Die katoenbedryf ervaar onder meer die volgende probleme:
Die kleinhandel moet ’n onderneming gee om ’n prys in die waardeketting aan te bied waarvolgens katoenproduksie op mediumtermyn volhoubaar is. Dit is sodat produsente in die waardeketting kan belê om meer kostedoeltreffende n produktiewer te wees.
As katoenpryse volhoubare produksie verseker, kan produsente plukkers met nuwe tegnologie laat invoer. Nuwe plukkers verhoog die naspeurbaarheid van katoen omdat elke baal gemerk kan word. Nuwe plukkers lewer ook skoner bale op. Met dié plukkers kan produsente katoen vinniger, kostedoeltreffende ren met minder verliese stroop. Tans beperk plukkers met ou tegnologie die uitbreiding van katoenproduksie. Produsente met plukkers met nuwe tegnologie sê minder trekkers is ook tydens die plukproses nodig.
’n Realiseerbare prys sal finansiers help om plukkers met nuwe tegnologie en nuwe produksie tegnieke te finansier om die bottelnek tydens die uitbreiding van katoenproduksie uit te skakel.
Die katoenbedryf beleef ’n opwindende tydperk waarin geleenthede die bedryf kan omkeer en produksie verhoog. Enkele probleme moet oorkom word om produksie te stimuleer en die wa deur die drif te trek.