’N BUL VAN ’N BAKKIE
Volkswagen het sy slegte én goeie nuus in een asem aangekondig: Die enkelkajuit-modelreeks sneuwel – en ’n dubbelkajuit-TDI word deel van die Amarok-reeks.
Sedert die Amarok se bekendstelling in 2010 het meer as 29 000 eenhede in Suid-Afrika baas gekry. Dit is tegnologies gevorderde bakkies waarvan die enkelkajuite as betroubare werkesels ingespan word, terwyl die dubbelkajuite meer in die ontspannings/leefstylmark tuis is.
Die nuwe reeks het ’n vars voorkoms. Die buffer het geïntegreerde misligte, maar die nuwe hoofligte in die sierrooster met sy horisontale lyne straal steeds die Volkswagen-DNS uit wat die Caddy en Transporter kenmerk. Nuwe ontwerpe vir die allooiwielvellings én verskillende wielgroottes rond die prentjie buite af.
Binne-in die kajuit val die meer horisontale ontwerp van die instrumentepaneel met ’n geïntegreerde inligtingskerm op. Skuif agter die stuur in en jy besef gou waarom Volkswagen die septer swaai wat ergonomie betref.
Die Amarok se lang lys veiligheidseienskappe sluit in vier lugsakke, ’n sluitweer-remstelsel (ABS), elektroniese stabiliteitsbeheer (ESP) en ’n na-botsremstelsel wat ’n tweede botsing kan voorkom.
SÓ LYK DIE NUWE REEKS
Aan die intreevlak is die 2 liter-TDI (103 kW) met ’n sesganghandratkas en die keuse van 4x2- of permanente 4MOTION-aandrywing. Volgende in die ry is die 2 liter BiTDi (132 kW) wat met ’n sesganghandratkas of ’n outomatiese agtgangratkas beskikbaar is.
Volkswagen se 4MOTION-vierwieltrekstelsel kan ingeskakel word by die handratkasbakkies, terwyl die 4MOTION-stelsel permanent ingeskakel is vir die 132 kW-bakkies met die outomatiese ratkas.
Hoewel die Amarok se V6-TDI-enjin van 3 liter reeds sedert 2014 in die Audi A6 en S7 ingespan word, staan die jongste weergawe bekend as die Generation II Evo-enjin.
Die silinderuitleg is 90 grade, daar is kopnokasse wat 24 kleppe aktiveer en ’n nuut ontwikkelde VGT-turbo-aanjaer wat die turbinedruk optimaliseer. Dit is danksy veranderlike vinne met kleiner speling om turbotraagheid regdeur die toerestrek te besweer ongeag die las. Hierdie turbo-aanjaer se temperatuur word glo vir die Suid-Afrikaanse toestande deur water in bedwang gehou.
Die verkoelingstelsel is in twee verdeel. Met dunner wande bereik die enjin gouer sy werktemperatuur, wat brandstofdoeltreffendheid verhoog.
Hierdie V6 lewer sy 165 kW drywing van 3 000 r/min. tot 4 500 r/min., terwyl 550 N.m wringkrag van 1 400 r/min. tot 1 750 r/min. beskikbaar is. Die enjin het ’n kragstuwing wat die drywing tot 180 kW en die wringkrag tot 580 N.m vir 10 sekondes verhoog.
Die outomatiese agtgangratkas se ratverhoudings is só gekies dat die hoër ratte die enjintoere teen hoër snelhede verlaag vir beter brandstofverbruik. Die laer ratverhoudings is weer baie kort om vir die afwesigheid van ’n laestrekratkas te vergoed.
Terloops, die eerste en laagste ratverhou- ding is byvoorbeeld laer as dié van die trurat!
Terwyl geen dubbelkajuitbakkie ’n toonbeeld van vaartbelyning is nie, is die V6 Amarok met sy gewig van meer as 2 ton baie flink uit die wegspringblokke. Dit kan binne agt sekondes van stilstaan tot 100 km/h versnel. Die gemiddelde brandstofverbruik is glo 9 liter/100 km wat met die 80 liter-tenk ’n reikafstand van meer as 850 km beteken.
Volkswagen het nie veel getorring aan die Amarok se stewige en bewese onderstel en veerstelsel nie. Die dubbel-mikveerstelsel voor en konvensionele bladvere agter bied goeie wielartikulasie.
Die laaibak van 2,52 m² is groot genoeg om ’n palet tussen die wielboë in te pas. Dit kan ’n loonvrag van 936 kg dra én terselfdertyd ’n sleepwa met remme en ’n vrag met ’n totale gewig van 3,3 ton sleep.
HANTEER SOOS ’N DROOM
Ek was onmiddelik tuis agter die V6 se stuurwiel. Die gebrek aan enjinlawaai (onthou, dit is ’n diesel!), die gemaklike en gladde werking, asook die werkverrigting van die enjin het my beïndruk. Ewe indrukwekkend is die gladde oorskakeling van die outomatiese agtgangratkas.
Op snelweë én sekondêre paaie met wisselende padoppervlakke was die stuurgevoel positief en veral die ritgehalte uitstekend. Die oorvloedige drywing skep gemoedrus en veral daardie kragstuwing tot 180 kW en 580 N.m vir 10 sekondes wanneer verbygesteek moet word, is verslawend.
Op ’n viertrekroete met ’n 3/5-gradering het die V6 nooit ’n wiel verkeerd gesit nie. Langs die rathefboom is ’n “Off Road”-skakelaar wat al die dinkwerk aan die elektroniese beheerstelsel oorlaat. Vir die meer betrokke viertrek-ryer is daar steeds die afsonderlike skakelaars vir die ewenaarsper, afdraanderembeheer en wielglipbeheer.
Die reeks het ’n vervaardigerswaarborg van drie jaar of 100 000 km, ’n diensplan van vyf jaar of 90 000 km en ’n teenroeswaarborg van ses jaar. Die versieningsintervalle is 15 000 km. Die pryse wissel van R487 700 tot R748 600.