VERLIGTING KOM DALK MET BRANDSTOFPRYSE
INSETTE Ná die skerp styging in brandstofpryse in die begin van die maand kan verbruikers uitsien na ’n mate van verligting in Junie.
Mnr. Wandile Sihlobo, ekonoom by die landbousakekamer Agbiz, sê danksy ’n daling in die prys van Brent-ruolie het dit teen die middel van die maand gelyk of daar op 7 Junie ’n daling van 23 sent per liter in die prys van petrol en ’n daling van sowat 19 sent per liter in die dieselprys kan wees.
“Die ander faktor wat ’n rol kan speel, is die wisselkoers, maar daar was nie ’n beduidende verandering in die koers nie.
“Die prys van Brent-ruolie het van gemiddeld $54 per vat in April tot gemiddeld $49 per vat gedaal.”
Hoewel dit nie ’n groot daling in brandstofpryse is nie, behoort die hele landbousektor daarby baat te vind omdat dit saamval met oestyd in die somerreëngebied en planttyd in die winterreëngebied. Brandstofkoste is sowat 11% van ’n graanboer in Suid-Afrika se produksiekoste.
’n Moontlike daling in brandstofpryse in Mei is omskep in ’n verhoging weens pres. Jacob Zuma se middernagtelike kabinetskommeling en die skade wat dit aan die rand veroorsaak het. Dit het meegebring dat die prys van petrol op 3 Mei met 49 sent per liter en die prys van diesel met 30 sent per liter gestyg het.
In April was daar ’n daling van 24 sent per liter in die petrolprys en ’n daling van 11 sent per liter in die prys van diesel.
Al die vorige maande vanjaar het die pryse gestyg.