RED LEWENS MET OORDEELKUNDIGE NOOD-OPTREDE
Die veiligheid van jou gesin op die plaas begin telkens in die huis. Hier is nuttige wenke oor hoe jy jouself en jou gesin doeltreffend kan beveilig.
Boosdoeners kry in talle gevalle sonder veel moeite toegang tot plaashuise deur middel van oop deure of vensters met geen diefwering. Die elemente wat in die vorige artikel bespreek is, soos heinings, videokameras en alarmstelsels, sal baie help om jou teen ’n aanval te beskerm. Dit sal egter ’n minimale effek hê indien deure en vensters nie beveilig word nie.
Plaasbewoners is in sulke situasies magteloos om hulle teen geweld en misdaad te verweer. Toegangsbeheer is uiters belangrik, of dit nou toegang tot jou plaas óf jou woonhuis is. Volg gerus die volgende raad.
Hou jou buitedeure te alle tye gesluit. Oop deure maak bykans enige ander veiligheidsmaatreël irrelevant. Bring sterk, korrek geïnstalleerde traliehekke by buitedeure, asook tussen slaapkamers en die res van die woonhuis aan. Sodoende het jy ’n ekstra laag sekuriteit tussen jou en ’n aanvaller. Gebruik ’n toeslaanhek omdat dit jou toelaat om jouself vinnig van ’n aanvaller te skei. Die enkele sekondes wat dit neem om te gryp na sleutels en ’n hek te sluit, kan die verskil tussen lewe en dood beteken. Sit sterk diefwering voor álle vensters. Sluit alle deure en hekke en maak vensters self toe wanneer jy iewers heen ry. Aanvallers kan jou dophou en in die huis inwag as jy tuis kom. Hou die buitegeboue op jou plaas gesluit. Só beskerm jy nie net jou eiendom nie, maar jy voorkom ook dat aanvallers in sulke geboue kan wegkruip. Bring veiligheidskameras aan wat jou toelaat om te sien wat reg rondom jou huis aangaan. Moenie die deur vir vreemdes oopmaak nie. Indien ’n vreemdeling goedsmoeds op jou plaas opdaag, oorweeg dit om jou veiligheidstrukture in kennis te stel. Moenie kontant in die huis hou nie – dit maak dadelik van jou ’n teiken. Leer jou plaaswerkers ook dat jy nie kontant op die plaas aanhou nie deur hulle gereeld te herinner dat hulle jou voor die tyd moet laat weet indien hulle geld by jou wil kom haal. Hou streng by dié reëling. Hou gereedskap, soos pikke, grawe en hamers, toegesluit wanneer dit nie gebruik word nie. Aanvallers kan dit as wapens teen jou gebruik. Verwyder bosse, lang gras of bome wat versperrings om jou huis kan wees. Dit is sodat jy enige oortreder op jou erf maklik kan raaksien en om te keer dat ’n boom of bos ’n oortreder kan help om oor heinings te klim.
HET JY ’N NOODPLAN?
Veiligheidsmaatreëls, die gesin se gewoontes en aksies binne die huis kan deurslaggewend wees as verweer teen ’n moontlike plaasaanval. Dit maak jou egter nie immuun teen ’n aanval nie. Oorweeg die volgende wenke om ’n noodplan gereed te kry:
STEL ’N NOODPLAN OP. Jou huis en gesin se omstandighede sal bepaal hoe die plan lyk. Oefen die plan in sodat almal weet wat om te doen as ’n aanval plaasvind.
SKEP ’N VEILIGHEIDSKAMER. Dr. Jane Buys van Vrystaat Landbou se veiligheidskomitee beveel aan dat ’n veiligheidskamer in die huis gevestig word waar die gesin kan wegkruip as ’n aanval dreig of plaasvind. Dié kamer behoort geen vensters te hê nie, moet verbind wees met die noodkommunikasiestelsel en daar moet ’n gelaaide vuurwapen wees. Ideaal gesproke moet jy in die kamer toegang kan kry tot beeldmateriaal van die veiligheidskameras rondom en binne jou huis. DINK VOORAF OOR REAKSIE. Mense tree verskillend op in krisissituasies. Party slaan op die vlug, ander veg terug, terwyl party só vasgevang is in die oomblik dat hulle nie ’n lit kan verroer nie. Dink na oor jou tipiese reaksie as die adrenalien vloei sodat jy voorbereid is. Die inoefening van die noodplan kan wondere verrig om jou voor te berei. As die plan genoeg geoefen
is, is dit makliker om outomaties die regte stappe tydens ’n aanval te doen, sonder die inmenging van adrenalien en ander streshormone. In ’n noodsituasie moet jy kalm bly en berekend reageer. MEMORISEER NOODNOMMERS.
Noodnommers en kontakbesonderhede vir jou gebiedsbeveiligi ngsnetwerk moet in die huis beskikbaar wees en, waar moontlik, moet gesinslede die nommers uit hul kop ken. Jy moet veral vinnig kan kontak maak met jou plaaswag en gebiedsbeveilig ingsnetwerk, aangesien dié mense in ’n noodgeval vinniger as die polisie of ’n ambulans by jou sal kan uitkom.
BLY BINNE. Moet onder geen omstandighede snags uit jou huis gaan nie. Honde wat blaf, vreemde geluide of krag wat afgaan, kan jou uit die huis en in ’n lokval lei. Indien jy vermoed dat alles nie wel is buite jou huis nie, bel jou plaaswag om te kom help.
REGTE TOERUSTING. Hou ’n brandblusser (wat almal weet hoe om te gebruik), asook ’n behoorlik toegeruste noodhulptassie in jou huis. Gesinslede moet basiese kennis van noodhulp hê en dit kan toepas as ’n aanval plaasvind. Dit kan lewens red.
HOU FLITSE GEREED. Bêre flitsligte met gelaaide batterye op strategiese plekke in jou huis. Die flitsligte kan jou help indien jou huis in donkerte gehul is en sommige kan ook vir selfverdediging gebruik word. Wees bedag daarop dat die gebruik van ’n flitslig jou posisie in die huis sal verklap.
VINGER OP DIE KNOPPIE. Maak seker jou alarmstelsel gee jou toegang tot ’n noodknoppie wat jy dadelik kan druk indien ’n aanval dreig. Die knoppie moet met jou sekerheidsmaatskappy verbind wees en, indien moontlik, ook met jou buurman, plaaswag en gebiedsbeve iligingstelsel. Mnr. Boeta du Toit, uitvoerende hoofbestuurder van Agri Noordwes, beveel aan dat boere so ’n knoppie te alle tye by hulle dra, of dit nou binne of buite die huis is. EKSTRA SELFOON. Steek ’n gelaaide selfoon in jou huis weg. In gevalle waar ander kommunikasiemiddele nie meer beskikbaar is nie, kan die selfoon jou lewe red. Radiokomm unikasie kan in party gevalle deur aanvallers buite werking gestel word. In ’n voorval vroeër vanjaar op die plaas Swartfontein tussen Warden en Verkykerskop het ’n swaar gewonde mnr. C.T. Steyn ’n ekstra selfoon in sy huis gebruik om sy suster te ontbied nadat hy tydens ’n plaasaanval met ’n mes gesteek is. Was dit nie vir dié selfoon nie, sou Steyn in sy toestand moes gaan hulp soek. Onthou ook tablette of rekenaars kan gebruik word om
kontak te maak met iemand wat kan help.
DRA JOU VUURWAPEN BY JOU. ’n Vuurwapen wat in ’n kluis toegesluit is, is vir jou min werd as jy onverhoeds betrap word of nie vinnig genoeg daarby kan uitkom nie. Maak seker jy is gemaklik met jou wapen. Gaan dit gereeld na en hou genoeg magasyne en ammunisie beskikbaar. Doen gereeld skietoefeninge. Jou hele gesin, waar toepaslik, moet gemaklik wees met ’n wapen en weet hoe om dit te gebruik. Besef egter ook dat ’n wapen teen jou gebruik kan word en onthou die verantwoordelikheid wat met die besit daarvan gepaardgaan.
In die volgende artikel kyk Heléne Booyens na die rol van honde in plaasbeskerming. Die gebruik van beskermingshonde kan teen alles van ’n konfrontasie by die plaashek tot bende-aanvalle ingespan word. Sy gesels met kenners oor verskillende honderasse en gee wenke wat jy op jou plaas kan toepas.